Ko e website www.kelea.to ko e konga pē ia ngāue ʻa e nusipepa Keleʻá. Naʻe fokotuʻu ʻa e website ko ení ʻi he 2011 ka naʻe toe fakaleleʻi ʻi he taʻú ni.

Ko e nusipepa Keleʻá naʻe fokotuʻu ia ʻe ʻAkilisi Pohiva ʻi Sepitema 1986, ʻaia ʻoku hoko ai ko e fuofua nusipepa fakataautaha kuo fokotuʻu ʻi Tongá. Ko ʻene taumuʻa ngāué ko hono fakamaama ʻa e kakai Tongá ki he faʻunga mo e founga ʻoku puleʻi ʻaki kinautolú, founga vahevahe e koloa ʻa e fonuá, founga tānaki mo e fakamoleki e tukuhaú pea mo e fakalakalaka fakatemokālatí.

Ko e kaveinga ngāue eni naʻe fuofua talatalanoaʻi ʻe ha kau ako Tonga ʻi USP ʻi he 1970 tupú hili ia ʻenau maʻu ʻa e pepa ʻa Dr Langi Huʻakavameiliku ʻo fokotuʻu ki he puleʻangá ke fakatemokālatiʻi ʻa e faʻunga fakapolitikale ʻo Tongá ʻi he 1975 ia. Naʻe tukuhifo ʻe he Tuʻi ʻo e ʻaho ko iá, Taufaʻāhau Tupou IV, ʻa e fokotuʻu ʻa Huʻakavameilikú ki he Kapinetí ke nau femeʻaʻaki ai tuʻo 10 ka naʻe ʻikai tali.

Naʻe maʻu ʻe he kau ako ʻa ʻAkilisi Pohivá ʻa e tatau ʻo e pepa ʻa Dr Huʻakavameilikú ʻi USP ʻo nau tālangaʻi ke nau foki mai ʻo teke ʻa e kaveinga ʻo e fakalelei fakatemokālatí. Naʻe foki mai ai ʻa ʻAkilisi Pohiva ki Tongá ni ʻo fakalele ʻene polokalama lētiō ʻi he A3Z ko e “Matalafolaukai” mei he 1981 Tīsema 1984. Ko e kaveinga ʻa e polokalamá ni ko e founga ʻoku vahevaheʻaki ʻa e koloa ʻa e fonuá. Ko e kau pēnolo aí ko ʻAkilisi Pōhiva, Palōfesa Futa Helu, Palesitni e Siasi Uesiliana Tau’atāina ‘o Tongá, Dr ʻAmanaki Havea mo e ‘Epikopō e Siasi Katolika Lomá, Pīsope Patelesio Fīnau.

ʻI he fakaava pē ʻa e pule’angá ‘i he 1985 naʻe taʻofi ai ʻe he puleʻangá ʻa e polokalama Matalafolaukaí. ʻI he ʻaho 22 Fepueli taʻu tatau naʻe tuli ai pē mo ʻAkilisi Pohiva mei he Potungāue Akó ʻaia naʻe fakakaungatāmaki aí.

ʻI he 1986, naʻe fokotuʻu ai ʻe ʻAkilisi Pohiva ʻa e nusipepa Keleʻá ke ne hoko atu ʻa e fatongia fakamaama e kakaí naʻe kamataʻi ʻe he Matalafolaukaí. Naʻe toe hopoʻi ai pē ʻe ʻAkilisi Pohiva ʻa e puleʻangá ki hono tuli ia mei he ngāué ʻo moʻua ai ʻa e puleʻangá. ʻI he 1987 naʻe fili Fale Alea ai ʻa ʻAkilisi ʻo hū ki he Fale Aleá pea ʻoku teʻeki ke tō ʻi ha fili Fale Alea ʻo aʻu ki he ʻahó ni.

Ko e kau ʻEtita kuo nau fua fatongia mai ʻi he nusipepa Keleʻá naʻe kamataʻi ia ʻe ʻAkilisi Pohiva pea hoko mai ki a Viliami Fukofuka, Poʻoi Pohiva, Tavake Fusimalohi pea ʻoku lolotonga fakahoko fatongia ai ʻa Māteni Tapueluelu. ʻOku ʻikai faʻa laua e hopo ʻa e nusipepá ni mo e kau takí talu mei he kamatá, ka ko e vahaʻa taimi ko ia naʻe toʻo ai ʻe Māteni ʻa e fatongiá ʻi he 2009 ko e hopo eni ʻe 14 pea ʻoku teʻeki ke ʻosi. Kotoa ko e ʻeke ʻe he kau minisitaá honau ongoongó ʻi he hopo laukovi.

ʻOku tufa ʻa e Keleʻá ʻi Tonga, Nuʻusila mo ʻAositelēlia. Pea koeʻuhí ko e fakalakalaka ʻa e tekinolosiá mo e fakaʻamu ke aʻu e ongoongo hotau fonuá ki he feituʻu pē ʻi he kolopé ʻoku ʻiai hotau kāingá naʻe fokotuʻu ai ʻa e website kelea.to

ʻOku mau fakālō ki a Matangi To'aho ʻi he tokoni ʻi hono fakahoko ʻa e ngāué ni kae pehē ki he poupou ʻa e kakaí ki he misiona ʻoku mau fua fatongia aí. ʻOku kei hokohoko atu hono langa mo hono fakalakalakaʻi ʻa e website ko ení pea ʻoku mau ʻamanaki ki ha fengāueʻaki vāofi mo kimoutolu kakai Tongá ʻi he kahaʻú na.


Editor

Name: 'Ofa Vatikani
Mob: (676) 77 80000

Manager
(Sales/Advertisement)

Name: Paula Mafi
Mob: (676) 77 70000

Journalist

Name: Livi Mafi
Mob: (676) 77 87809

Graphic Designer/Layout

Name: Semisi Tu'ipulotu
Mob: (676) 77 02538

Sports Reporter

Name: Joh. E Fifita
Mob: (676) 75 12345

Journalist

Name: Sione Hia
Mob: (676) 77 99000