'E fai 'a e paloti ke tukuhifo e pule'anga 'i he 'uluaki paloti pe 'e fakapulipuli 'a e paloti ko ia
Ke Hoko Mai Ho Pule'anga

Kuo ‘osi tali ‘i he Fale Alea ‘i he ‘aho Tusite 4 ‘Okatopa ke tukuhifo ki he Komiti Kakato ke alea’i ai ‘a e ngaahi fokotu’u liliu ki he tu’utu’uni ‘a e Fale Alea. Ko e taha e ngaahi fokotu’u tu’utu’uni ‘e fai ai ‘a e feme’a’aki malohi mo lalahi ko e fokotu’u ki he tu’utu’uni ke fakahoko fakapulipuli ‘a e paloti ke tukuhifo ‘a e Palemia. Ko e ngaahi poini eni ‘e fai ai ‘a e faikehekehe lahi ‘aia ‘e ‘ikai tui ai ‘a e Paati e ‘Otumotu Anga’ofa ia ke fakahoko fakapulipuli ‘a e paloti ke tukuhifo ‘a e Palemia.

‘Oku ‘ikai ke ‘asi ia ‘i he Konisitutone ke paloti’i fakapulipuli ‘a hono tukuhifo ‘o e Palemia. ‘Oku fakamatala’i ‘e he kupu 50B ‘o e Konisitutone ‘a e founga ke fai ‘aki ‘a e Paloti ke Tukuhifo ‘a e Palemia ‘aia ‘oku fakalea ‘o pehe.

“50B. Paloti ke fakamaloloo’i ‘a e Palemia

50B (1) Kapau kuo paasi ‘e he Fale Alea ha fokotu’u kuo fakamatala’i ko ha “Paloti ke fakamaloloo’i ‘a e Palemia” ‘o fakatatau ki he kupu ni, pea ‘i hono fakaha ‘o e tu’utu’uni ko ia ki he Tu’i ‘e he Sea, kuo pau ‘e lau kuo fakafisi pea kuo fakata’e’aonga’i ‘a e ngaahi fakanofo ‘o e Palemia mo e kau minisita hono kotoa.”  

 

‘Oku ‘ikai ke fakahaa mai heni ‘e he Konisitutone ke paloti’i fakapulipuli. ‘Oku ne talamai ke paasi ‘a e “Fokotu’u” pe Motion. Ko e founga ngaue ‘a e Fale Alea ki hono fakapaasi ‘a e ngaahi ngaue kotoa ‘a e Fale Alea, kau ai ‘a e Fakamatala Patiseti, Lao, Tu’utu’uni FakaFale Alea pea mo e Fokotu’u mo ha toe me’a pee ‘oku paloti’i hikinima’i pea lau ‘e he kalake – kau ai ‘a e Motion pe “Fokotu’u” ‘oku fakaha mai ‘e he Konisitutone.

Ko e founga ko eni na’e ‘osi fakahoko ‘aki ia ‘a e Paloti ke Fakamaloloo’i ‘a e Palemia ki mu’a, Nopele Tu’ivakano, ‘i he pule’anga motu’a ‘o Tu’ivakano. Na’e hikinima’i ‘a e Vote of No Confidence ko ia pea hiki ai ‘a Sangster Saulala mei he Paati ke hoko atu ‘a Nopele Tu’ivakano ‘o ‘ilo ai ‘e he kakai ‘ene heke.

Ka ‘i he ta’u ni kuo fatu mai ‘e he Komiti Lao ‘a e Fale Alea ‘aia ‘oku Sea ai ‘a Samiu Vaipulu ke paloti’i fakapulipuli ‘a e tukuhifo ‘o e Palemia.

Fakatokanga’i ange ‘oku tu’u fakataha pee ‘a e ongo kupu’i Konisitutone ‘oku na fakamatala’i mai ‘a e founga ki hono fili hake ‘o ha Palemia mo e founga hono tukuhifo ‘o ha Palemia.

‘Oku fakamatala’i ‘e he kupu 50A ‘a e founga ke fili hake ai ha Palemia ki he lakanga Palemia ‘o pehe ni.

 

50A Ko e Palemia

(1)  Kuo pau ke fakanofo ‘e he Tu’i mei he kau fakafofonga kuo fili, ha Palemia ‘a ia kuo fokotu’u atu ‘e he Fale Alea, ‘o fakatatau ki he founga ngaue kuo fokotu’u atu ‘i he Tepile ki he, pe kupu 50B, ‘o e Konisitutone ni.

 

Sai ko e tepile ko ia ‘oku ‘asi ‘i he kupu ‘i ‘olunga ‘oku fakapipiki ia ‘i mui he Konisitutone ‘o Tonga ko e Tepile A pea ‘oku ne fakamatala’i fakaikiiki ai ‘a e founga ke fili hake ‘aki ha Palemia – ‘ikai ko hono tukuhifo ‘aki.

Ko e founga tukuhifo e mei he lakanga ‘o e Palemia ‘oku haa ‘i he kupu 50B na’e fai ki ai ‘a e fua lave ‘i ‘olunga. Ko e founga fakanofo hake eni ki he lakanga ‘i he kupu 50A pea ko hono tepile fakaikiiki ‘o e founga ko ia ‘oku pehe:

 

Tepile Kupu 50A

Founga ke Ngaue ki hono fakanofo ‘o ha Palemia

1 (c) Kuopau ki he kau fakafofonga ma’u fakataha kenau fakakaukau’i pe kohai tenau fokotu’u ke fakanofo ko e Palemia Fili… pea kuo pau kenau fili ‘i ha paloti fakapulipuli. 

 

Fakatokanga’i ange ‘oku ua ‘a e founga ‘oku lava ai ‘e he Fale Alea ‘o fokotu’u atu ha Palemia ‘o fakatatau ki he fakalea ‘o e kupu 50A ‘i ‘olunga ‘aia ‘oku ‘ilonga ia hono fakalea fakapilitania ‘o pehe.

 

50A

“THE PRIME MINISTER

The Prime Minister

(1) The King shall appoint from amongst the elected representatives a Prime Minister who is recommended by the Legislative Assembly in accordance with the procedure set out in the Schedule to, or clause 50B of, this Constitution.

 

Ko e founga ‘uluaki hono fili hake ‘o e Palemia ‘oku fakapulipuli ‘i he taimi ‘oku fuofua fili’i hake ai ‘a e Palemia ‘i he ‘osi pee ‘a e Fili Fale Alea Lahi pe General Election. Ko e fili ia ‘oku ha’u ai ‘a e Sea Fakataimi mei tu’a ko Lord Tevita Tupou, ‘o Sea fakataimi pea lau ‘a e lahi ‘o e vouti ‘o ‘ave ki ai.

Ko e founga hono ua ko hono tukuhifo ‘a e Palemia ‘i ha Vote of No Confidence kae fili fo’ou ia ‘i he Motion hangee ko ia ‘oku haa ‘i he kupu 50B. ‘Aia ‘oku ‘ikai ke toe fakapulipuli ia ka ‘oku paloti.

Ko e ‘uhinga ia na’e ‘ikai ke toe faka’asi ai ha lea “paloti fakapulipuli” ‘i he kupu 50B koe’uhi ‘oku paloti hikinima ‘a e Fale Alea ‘i he motion mo e me’a kehe kotoa pe. Pea ‘oku tu’utu’uni ‘a e kupu 56 ‘o e Konisitutone, ka ‘ilonga ha me’a ‘e loto ki ai ‘a e Fale Alea kuo pau ke hikinima’i.

‘Oku toki fatu tu’utu’uni hake eni ‘a e Komiti Lao ‘oku Sea ai ‘a Samiu Vaipulu ke paloti fakapulipuli ‘a e Vote of No Confidence.

 

Ko e ha ‘a e ‘uhinga?

‘Oku ou nofo ‘o fifili ko e ha ‘a e ‘uhinga kuo fai ai ‘a e fu’u afe kikii fakafokifaa ko eni. Pea ‘oku taha pee ‘a e ‘uhinga ‘oku ou lava ‘analaiso mo faka’uhinga ki ai. ‘Aia ‘oku taumu’a ia ke lava ha ni’ihi ‘i he tafa’aki ‘a e kakai mo e Paati ‘o moulu fakapulipuli atu kenau kau ‘i he paloti fakapulipuli ko ia koe’uhi pee ‘oku ‘ikai kenau ma’u ‘a e tokolahi fe’unga kenau fokotu’u ha pule’anga.

Tau pehee kapau ‘e moulu atu ha toko 4 ‘o nau ma’u ai ‘a e tokolahi, pea fokotu’u hanau pule’anga. Sai ‘e foaki leva ha lakanga minisitaa ia ki ha toko 7 fakalukufua pea pulia ai pee ‘a e toko 4 ia na’e heke ‘o mate tupu’a ai ‘a e kakai mei tu’a. Ko e me’a ko u lava sio ki ai ‘oku ‘iai ‘a e feinga ke kaufaki’i ha ni’ihi tenau fai ha lavaki hangee ko ia na’e fai ‘e Sangster Saulala koe’uhi ko e tautea kuo fai ‘e he kakai ki he ni’ihi heke pehee.  

Makehe mei heni ‘oku ‘iai ha palopalema ko u sio ki ai. Ko e fuofua paloti fakapulipuli ‘i he fili Palemia ‘i he ‘osi ‘a e fili lahi ‘oku ha’u ‘a e Sea Fakataimi ia mei tu’a ‘oku ‘ikai ke kau ‘i he kanititeiti Palemea pe paloti ‘i he fili. ‘Oku tu’u ‘ata ia mei tu’a. Pea ko e taimi te ne talamai ai ko “me’a” ‘oku ne ma’u  ‘aki ‘a e fo’i paloti ko e 15, ‘e lava ia ke falala’ia ‘ene talamai neongo ‘oku ‘ikai ke toe sio ha taha ia ki he ngaahi paloti na’e lau.

Sai ko e fo’i paloti fakapulipuli ko eni ‘i he Vote of No Confidence ‘a e kau Fale Alea pee… ke lau ‘e hai? Pea talamai ‘e hai? Kohai ‘e falala atu ka pehe mai ‘a Tu’ivakano kuo paloti fakapulipuli ‘a e toko 16 ke tukuhifo ‘a e Palemia? Kohai ‘e tui ki ai he ‘oku ‘ikai ke mau lau pe sio ai. Pea na’e ‘ikai ke poupou ‘a Tu’ivakano ia ki he Palemia lolotonga pea ‘oku ‘ikai kemau Paati pea ko e nopele ia. ‘Oku fu’u ta’efalala’anga ‘a e founga ko eni ke fokotu’u he ko hono mo’oni ko e ongo fa’ahi lalahi ‘i he Fale Alea ko e fa’ahi ‘a e kau nopele mo e fa’ahi ‘a e kakai. Pea ko ha ‘u paloti pehe ni he kaha’u, kapau ‘e tali, ‘e lau pe ia ‘e he nopele he ‘oku tu’utu’uni ‘a e Konisitutone ia ke fili pee ‘a e Sea e Fale Alea mei he nopele pee.

‘Oku toe fakahaa foki ia ‘i he ngaahi liliu ko eni kuo pau ke ‘iai mo e fo’i paloti ia ‘a e Sea ‘o e Fale Alea! ‘Aia ‘e Sea pee ia pea toe paloti foki!

Ko e me’a ‘oku haa mai kiate au, ‘oku mahino ‘a e feinga tautamate ke tuku ki tu’a ‘a e Palemia lolotonga pea ‘oku ofe’i ‘a e founga lolotonga ki he feima’u ‘a e ni’ihi pee ia.

‘I he’ene pehee ko e ni’ihi tenau paloti ke tali ‘a e fatu tu’utu’uni fo’ou ko eni ke fakahoko fakapulipuli ‘a e paloti ke tukuhifo ‘a e Palemia, ko e ni’ihi ia tenau paloti ke tukuhifo ‘a e pule’anga lolotonga. Ko ia ai ko e ni’ihi tenau paloti poupou ke fakahoko fakapulipuli ‘a e Vote of No Confidence ko kinautolu ia tenau loto ke tukuhifo ‘a e pule’anga lolotonga. Pea ko e paloti ‘i he tu’utu’uni fo’ou ko eni ko e paloti Vote of No Confidence pee ia.

Posted on Monday 17th of October 2016 09:29:21 AM