Kolomu Soileti Finau

Ne u fanongo he talaloto ‘a e tangata he polokalama lētiō ko e “family life ministry” ki he ‘aho ‘e taha naʻe ‘alu ai mo hono malí ki ha fuʻu falekoloa lahi ko ‘ena fakatau.  Ko e taimi ko ia, naʻá na hifo ai he sitepu ‘uhilá, ‘oku ‘alu hake ha fefine fakaʻofoʻofa he sitepu ‘uhila ‘alu hake ‘i hona tafaʻakí. ‘Asili ai mo hono teuteu naʻe fuʻu fakalaukau mo tohoakiʻi tokanga.  Naʻe ngalo ia he tangatá ni ‘okú ne puke ‘a e nima hono malí.  Ka e tafoki hono mata ‘ona ‘o tulimui he fefine kehé.  Naʻe ala hake ‘a e nima hono malí ‘o leʻei fakafoki mai hono fofonga mo leaange, “ko au ho ‘ofaʻangá.”  Pea ngata ‘a e talaloto ‘a e tangatá ni.  Ka ko ‘ene talanoa ki he hiki ngofua ‘etau tokanga he “taʻe tokanga ‘a e sió”.

‘Oku hiki ‘e Mātiu ‘a e talanoa fakangalo ngataʻa ki he ‘aho naʻe fakapoongi ai ‘a Sione Papitaiso.  Ko e ‘elito ‘o e talanoá ni naʻe fōfoaʻi meí he talanoa hono maʻalali ‘o e ʹaho faʹeleʹi ‘o Helota ko e Tuʻí.  Naʻe fai ‘e Salome ha tauʻolunga fakapalesitaine.  Ko e ‘ofefine ia ‘o Helōtiasi ko e mali ‘o Helota mo Helota Filipe ko e tehina pe ‘o Helota.  ‘A ia ko Salome ko e step daughter ‘o Helota.  Pea ko Helōtiasi ko e ‘ilamutu pe ‘o Helota naʻe ‘uluaki mali mo Filipe ko hono tehina.  Naʻe faʻao ‘e Helota ia ‘a Helōtiasi ke hoko ko hono uaifi ka e tukuange hono uaifí ko Fasaeli ko e ‘ofefine ‘o Aleta ko e Tuʻi Napataea.

Sinoemeʻa, naʻe faʻa valokiʻi fefeka ‘e Sione Papitaiso ‘a e fakamalaʻia he fale ‘o e Tuʻí.  Naʻe hoko e hula ‘a Salome ko ha mounu ke ne kaihaʻasi e tokanga ‘a Helotá.  Naʻá ne moʻusioa he hula ‘a Salome pea ne fai ai ha palōmesi fakavalevale kia Salome, ke ne kole ha meʻa pe tatau ai pē pe ko e vaeua ‘o e Puleʻanga.  Ka e pangó, ne fili ai ‘a Salome ke fakapoongi ‘a e tonuhia.

Fakatokangaʻiange ‘a e fuʻu ivi lahi ‘o e meʻa ko e “SIO”.  ‘Okú ne lohu mai e angahalá.  ‘Okú ne veuki ha puleʻanga, ‘okú ne fatu ‘a e palōmesi loi, ‘okú ne maumauʻi ‘a e familí.  Ko Tevita, ne siʻi tō pe ‘i heʻene sio kia Patisepá, ko Siutasi naʻá ne lavakiʻi pē ‘a Sīsū heʻene sio ki he fetapaki ‘a e siliva.

Pehē ‘e Solomone ‘ia Palovepi ko e meʻa ‘e 6 ‘oku fakaliliʻa ki ai ‘a Sihova.  Ko e ‘uluakí, ko e meʻa ko e “matahihiki”.  Ko e sio ia ‘e taha ‘a e ‘afungí.  ‘Oku tala pe ‘e he fofonga ko e “matahihiki”.  ‘Oku fehiʻa ‘a e ‘Otua ki ai he ‘okú Ne talamai ‘a e kovi mo e ‘afungi ‘a e moʻuí.

Kainga, ‘oku mākehe atu pe ‘a e sio ‘a Sīsū, fakamatala ‘a Luke vahe 7 ki he taimi ne “SIO”     ai ki he fefine uitou Neini, naʻe langa hono fatu ‘i he ‘ofá.  Kapau ‘oku tau maʻu ‘a Sīsū mo pule ki heʻetau moʻuí, ‘oku malava ke tau sioʻaki ‘a e faʻahinga sio naʻe ‘iate Ia.

‘Oku tuʻu lavea ngofua maʻu pe ‘etau moʻuí ki he angahalá ‘i heʻetau “SIO”.  Kapau ‘e ‘ikai ke tau maʻu ‘a Sīsū pea tau fai kovinanite mo hotau fofongá he ‘aho kotoa, ‘e ke i faingofua pe ‘a e hoko ‘etau “SIO” ko hotau tūkiaʻanga mo e mateʻanga.

Posted on Monday 17th of October 2016 09:31:18 AM