Kainga, ko e natula ‘etau moʻuí ‘oku hangē tofu pe ko e talanoá ni.

Naʻe ‘i ai ha tangata naʻe teu ‘ene ‘alu ki ha katōanga.  Peá ne fakaʻamu ke kumi hano suti mākehe mo fakaʻofoʻofa ke ne tui ke hā masani ki he katoangá ni.  Naʻá ne lele he hala ki ha falekoloa peá ne fakatokangaʻi ha fale ‘oku tuʻuaki mei loto ha ngaahi suti fakaʻofoʻofa.  Naʻá ne afe ‘o toʻoa he fakaʻofoʻofa ‘o e ngaahi sutí pea ne fakatau ‘a e taha.  Ko e taimi ne maau ai ‘ene teuteu ke ‘alu ki he katōangá ‘o ne toʻo mai ‘ene wallet ke faʻo hifo ki he kato ‘o e koté, ‘ohovale ia he homo hifo ‘ene wallet ‘o tō ki tuʻá.  Pea ne fā hifo ki he kato hono koté ‘oku ‘ikai hano kato.  Meʻa tatau pe ki hono talausese sutí, ‘oku hala kato mo ia.

 

Naʻá ne toe foki ki he falekoloá ke lāunga hono mamahí.  Fakaʻohovale hono talaange ‘e he tangata fai fakataú, “Naʻá ke lau ‘a e tohi ‘i tuʻa he falekoloá?  Ko e ngaahi suti ‘oku mau fakatau atu, ko e suti ia ‘o e kau mate meí he falematé, pea ko e ‘uhinga ia ‘oku mau tuʻusi ai e kato ‘o e ngaahi sutí, ko e fakaʻilongaʻi ko e suti ‘o e kau mate.”

Kainga, ko e natula ‘etau moʻuí ‘oku hangē tofu pe ko e talanoá ni.  Taimi lahi ‘oku ‘ikai ke tau fakatokangaʻi ‘e kitautolu ‘a e fuʻu nounou ‘a e moʻuí.  LIFE IS VERY SHORT.  Ka ko e meʻa ia ‘oku invest ai ‘a e konga lahi ‘o ‘etau moʻuí he lolotongá ni.  ‘Oku tau felupe ‘a e ngaahi meʻa lahi mo tūlia hono masaní, ka ‘oku tau faʻo ‘e kitautolu he fuʻu kato ava.  Mahuʻinga lahi ke ke huʻuhuʻu mo fakatokanga meʻa.  Ko e hā ‘a e meʻa ‘oku invest ai hoʻo moʻuí.

Ko Paula, neongo ko e mataotao ia he Laó, ka ko e taha hono faiva ko e ngaohi “TENITÍ”.  Naʻá ne nofo ‘i Kolinitō he mahina ‘e 18 ‘i he ongomātuʻa ko Pisila mo ‘Akuila ‘o kamata ‘a e ngāue fakamisinalé.

Ko ‘enau maʻuʻanga moʻuí ko e tuitui “TENITI”.  Pea ko e talanoa ‘o e ‘ahó ni, ‘oku hanga ‘e he ‘aposetoló ‘o unuhi mai e tala mālie ‘o e natula ‘o e “TENITI” ko e sīpinga ke ofongi ki ai ‘etau moʻuí.  Ko Kōlinitó, naʻe tuʻu he kavelemotu, ‘o hoko ‘a ‘Esia Mino mo e ngaahi fonua ‘o Palesitaine.  Pea ko hono taulanga talā naʻe hingoa ko Senikelea.  Ko e hifoʻanga mo e hakeʻanga ‘o e folau vaka.  Naʻe ‘i ai pe ‘a e Kananga fakatalutalu ‘o Kōlinito hangē ko honau luma nai; “Hangē ha taʻahine Kōlinito”.  Ko e ‘uhinga pe ki he faʻahinga toʻonga moʻui fakalusa ‘a e koló ni.  Naʻe tuʻu ai mo e temipale ‘o ‘Apolo mo hono kau taupoʻou tapu.  Ko e pitenga ia ‘o tuʻa mamani ‘o e kuonga ko ia.  Ko e faʻahinga ‘atākai fulikivanu pehḗ, naʻe fiemaʻu pe ha taha ‘oku laione hono lotó pea hangē ha taufa tō takutakú hono leʻo ke kalangaʻaki ‘a e Kosipelí.  Ko e taha eni he lesoni fakaʻosi ‘a Paula ke tukiʻiʻaki ‘a e loto fefeka ‘o e kakai Kōlinito.  Ko ‘ene talanoa ki he ikuʻanga ‘o ‘etau moʻuí.  Ko ‘etau moʻuí ‘oku hange tofu pe ha “TENITI”.  Fuʻu nounou fau.  Ko e tuʻuʻanga fakaʻosi hotau “TENITÍ ‘i mamaní, ko e ‘aho ‘o ‘etau mate.  Ko ‘ene pelu ia ‘a e kahoki mo e lā pea saoti ‘a e “TENITÍ”. 

Ka ‘oku ‘i ai ‘a e ‘API MAʻU, ko e fale LANGA ‘E HE ‘OTUA maʻae kakai ‘oku foaki ‘enau moʻuí maʻa Kalaisi.  Heʻikai ‘aonga ‘a e “TENITI” ia ai.  Kaungā Pilikimi, ‘oku ‘i ai e tokolahi ‘oku nau nofo lata he fuʻu “TENITI” mo tuku taupe ai.  Manatu ‘e vavé ni mai hono vete ‘o e “TENITÍ”.  Ko e fehuʻí: kuó ke māteuteu nai ki he “API MAʻÚ??”  Kuó u fakaʻamu pe ke u fakalotolahi atu, ‘okapau ‘okú ke lau ‘a e fakalotolahí ni, te ke tōmui meí he “API MAʻÚ” ‘okapau ‘e ‘ikai te ke ‘ilo ko e nofo hikihiki “TENITI” pe ‘a e moʻui fuo nounoú ni.  Te u tokamuʻa, fakavetevete hoʻo tokanga meí he ngaahi meʻa ‘o e “TENITÍ” - ngaahi meʻa ‘o mamaní.  Foaki kakato hoʻo moʻuí maʻa Sīsū, liʻaki e ‘alunga angahalá, he ko e naunau ia ‘o e “TENITI”.  Hohoi mo faʻofua ki he kelesi mo e ‘aloʻofa ‘a e ‘Otuá.  Ko Sīsú pē te ne ‘ave koe ki he “‘API MAʻÚ”.

Posted on Monday 14th of November 2016 10:14:22 AM