'Okatopa pingikī; ke fakamamafa'i hono tokangaekina 'o e kanisā huhú
Kautaha Kanisā Huhu 'a Tonga

‘Oku anga maheni ‘aki pē ‘i he taʹu kotoa ‘a e māhina ‘Okatopá ‘a hono fakaʹilongaʹi makehe ai ‘a e fokoutua kanisā huhú pea ko e lanu pingikií (pink) ‘oku fakaeʹa totonu atu ai ‘a e uki ngāue ‘oku takimuʹa ai ‘a e Kautaha Sosaieti Kanisā Huhu ‘a Tongá ke fai hano fakamamafaʹi makehe ‘a e fokoutuá ni.

 

‘I he taʹú ni ‘oku malumalu ‘a e ngāué ‘i he kaveinga “We are Stronger Together” pe “Kaukaua ‘i he’etau Taha”

Naʹe fakaʹilongaʹi ‘a e kamata ‘o e māhina pingikī ‘e he taʹahine Pataloní, Pilinisesi Sālote Mafileʹo Pilolevu Tuita ‘i he ‘aho 3 ‘o ‘Okatopá pea kuo ‘osi fokotuʹutuʹu mo e ngaahi polokalama fakamānako ki he māhiná ‘a ia ‘e malava ke hoko ko e fakaʹaiʹai ki he kakai fefine ‘o e fonuá.

Ko e taha ‘o e ngaahi polokalama fakaʹaiʹai ko ení, ko ha feʹauhi ‘a ia naʹe fakahā ‘e he Palesiteni ‘o e Sosaieti Kanisā Huhu ‘a Tongá, ‘Eiki Fatafehi ‘o Lāpaha Tuita-Filipe ko e feʹauhí ‘oku fakaʹatā ki he ngaahi kautaha pisinisí mo e ngaahi potungāué ‘o aʹu ki he ngaahi akó, siasí mo e ngaahi kulupu toʹutupu pē ‘i he fonuá kenau kau ki ai ‘a ia ko ‘enau lēsisita pea feʹauhi ki hono teuteuʹi ‘a honau ngaahi ‘ōfisí ‘o fakatatau ki he lanu pingikī mo e kaveinga ‘o e ta’ú ni.

“Ko e taumuʹá ke hā mahino atu ki he kakaí ‘a e kemipeini mahuʹinga ki hono tokangaekina ‘o e fokoutua ‘o e kanisā huhú mei he anga hono teuteuʹi ‘aki ‘a e lanu pingikií honau ngaahi ‘ōfisí pea malava pē mei ai ‘o fakaa’u atu ‘a e fekau mahuʹinga ko ení.”

‘Oku ‘i ai ‘a e pē ‘a e kōmiti tenau toki vakaiʹi ‘a e ngaahi ‘ōfisi kuo lēsisitá pea ko e kinautolu ‘e ikuná ‘e malava ke maʹu ha sitifikeiti kuo fakamoʹoni ki ai ‘a e taʹahine Pilinisesí, Pilolevu Tuita.

Naʹe fakahoko pē ‘a e fe’auhi tatau he taʹu kuo ʹosí ka naʹe nofo taha pē ki he ongo kalasi ‘e ua, ‘a ia ko e kalasi ki he ngaahi ‘ōfisí pea mo e kalasi ki he ngaahi pisinisí, ka naʹe fakahā ‘e he Palesitení, ‘i he taʹú ni ‘oku fakaʹamu ‘a e kautaha kanisā huhú ke fakaʹataá ke kau mai ‘a e tokolahi tahá hangē ko e ngaahi ‘apiakó, ko e ngaahi kulupu toʹutupú koeʹuhī ke malava ke toe ‘ata lahi ange ‘a hono fakaaʹu atu ‘a e fekau mahuʹinga ‘o e ngāue fakataha ke tēkoloʹi ‘a e fokoutua ‘o e kanisā huhú.

Makehe mei hení ‘e toe ‘i ai mo e polokalama tali fehuʹi (Quiz) ‘a ia ‘e fakahoko ki he Billfish ‘i he efiafi Pulelulu 22 ‘o ‘Okatopá pea pehē ki ha laka moʹuilelei ‘e fakahoko he ‘aho 29.

‘I he taʹu kotoa pē kuo aʹu ki he keisi foʹou ‘e 20-25 ‘a e kakai fefine kuo nau moʹua ‘i he fokoutua kanisā huhú pea naʹe pehē ‘e he Talēkita Moʹuí, Dr. Siale ‘Akauʹola ‘i hono fakaava ‘a e kemipeiní, ‘oku malava ke fai ha tokoni kei taimi ki he faʹahinga ‘oku nau tuʹu lavea ngofua ki he fokoutuá, ka ‘oku mahuʹinga ke fai ha ngāue fakataha pea ‘oua ‘e manavasiʹi ke ō ange ki he vahaʹa makehe ki he fokoutuá ni ke fai hano sivi kinautolu. 

Posted on Monday 14th of November 2016 10:24:31 AM