Hili ha taʻu ‘e 2 ‘o e Tau Lahi hono Uá
Fakaloto lahi 'o e Uike

Hili ha taʻu ‘e 2 ‘o e Tau Lahi hono Uá, 1947, naʻe fakaāfeʻi ai ‘e ha siasi fakakalisitiane ‘i Munich, Siamane ha fefine ngāue fakamisinale Holani ko Corrie Den Boom ke ne fakahoko ha lea ‘i he siasi.  Naʻe lea ‘a Corrie ‘i he kaveinga ko e “Fakamolemole ‘a e ‘Otuá”.  Naʻe ‘osi ‘a e leá ni pea mātuku fakalongolongo pe ‘a e kakaí.  Lolotonga faingataʻa ki he kakaí ke nau tali ‘a e moʻoni ‘o e “Fakamolemole ‘a e ‘Otuá” koeʻuhí ko e fulikivanu mo e palakú ‘o e ngaahi meʻa naʻa nau sio mata ai.

Hangē tokua ha “SCARS” pē ko ia ‘oku tau ui ko e “PIKI” ‘a e nofo ‘a e “guilts” ‘i honau lotó pē ‘e anga fēfē hano fakamolemoleʻi ‘e he kakai tokolahi ‘o mamani ‘a e kakai Siamané he toʻonga pāpeliane naʻa nau fakahoko.  Naʻe hili ‘a e lea ‘a Corrie Den Boom pea ne fakatokangaʻi ha tangata lōlōa kote lanu kulei mo tātā melomelo ‘oku sio fakamamaʻuange kiate ia.  Ko Corrie mo hono taʻoketé, Betsy naʻe tuku popula he pilīsone Ravensbruck ‘i Holani lolotonga ‘a e taú.  Ko e taimi ne sio ai ‘a Corrie ki he tangatá ni, naʻá ne manatuʻi ko e sōtia Siamane ‘eni naʻe kaʻate pule he pilīsone Ravensbruck pea ko ia naʻá ne fakapoongi hono taʻoketé, ‘a Betsy.

Naʻe fakavave mai ‘a e tangatá ni kia Corrie ‘o ne talaange, “ko au kuó u ‘osi tali ‘a Sīsū pea kuo liliu ‘e Sīsú ‘eku moʻuí, “would you forgive me, please”.  Naʻe ala atu ‘a Corrie ‘o puke hono nimá, “Yes, I forgive you”.  Naʻe lelenoa pē ‘a e loʻimatá he fofonga ‘o e tangatá ni mo malimali.  Ko ‘ene ‘ilo kuo fakamolemoleʻi ia ‘e he tokotaha naʻe faikovi ki ai.  Ko e loʻimata ‘o e fiefia.  He naʻe hangē ha “SCARS” ‘a e nofo ‘a e ongoʻi tautea ‘i hono loto ‘i heʻene kovi naʻá ne fēia.

Naʻe feʻao tatau pe ‘a e fanga taʻokete ‘e toko 10 ‘o Siosifá mo e “halaia” tatau he kovi naʻa nau fai ki honau tehina.  ‘Oku fanauʻi ‘e he faʻahinga tautea loto ko iá ‘a e ilifia ki he sāuni.  Pea toki loki ia he tūkunga manatú ‘o hoko ko e mahaki fakaeloto ‘a ‘ete feʻao mo e “guilt” ‘o hangē pe ha “SCAR” ke ne toutou fakamanatu kia kita ‘ete koví.  ‘Okú ne fakailifiaʻi (haunt) kita pea siʻi ke fakalaka ‘a e moʻui.  Aʻu ai pē ki he tuʻunga kuo fakakaukau ‘a e niʻihi kuó te fuʻu kovi kita pea ‘ikai tuha mo e fakamolemole ‘a e ‘Otuá.  Pea faingōfua ki he tokolahi ke toʻo ‘enau moʻui.  Tatau pē mo e taimi ‘okú te sio ai ki he “SCAR” hoto nimá pea ‘okú te manatuʻi maʻu ai pe ‘a e ‘uhinga naʻe lavea ai.  Ko e fanga taʻokete ‘o Siosifá, ‘i heʻenau fononga ki ‘Isipité pea taʻofi kinautolu ke ‘oua te nau foki ki Kenaní, ko e ‘uluaki meʻa pē naʻe manatuʻi ‘e Lupeni mo Siutá, ko ‘enau kovi naʻe fai ki honau tehiná.  Ko e ‘osi eni ha meimei taʻu ‘e 20 mei ai.  ‘Oku kei hoko pē ko e “SCAR” ‘a e nofo loto ‘a e tauteá.  Mālie lahi ko e anga fai ‘a Siosifá, hanga ‘e he loloto ‘o e fakamolemole ‘o taʻaki mo e aka ‘a e “SCARS” ‘o e loto tauteá.

Kāinga, ko e meʻa fakatauʻātaina ko e “Fakamolemole”.  ‘Oku meʻa ngāueʻaki ‘e Setane ‘a e “Loto Tauteá” ke hoko ko e “SCAR” ke ‘oua naʻá te matanga mei ai.  Ka ne hanga ‘o nonoʻo kita ke te situʻa meí he fakamolemole ‘a e ‘Otuá.  ‘I he funga ‘o ‘ete fakakaukau ‘oku fuʻu lahi e meʻa naʻá te fai ke fakamolemoleʻi ‘e he ‘Otuá.  Ko e loi lahi ia ‘a e Tevolo.  ‘Oku lekooti ‘ia ‘Aisea 43:25 ‘a e lea ko ‘ení, “Ko Au, Ko Au ai pē, ‘oku Ou tamateʻi hoʻo ngaahi angahalá, koeʻuhí pe ko Au: pea ko hoʻo ngaahi hia ‘e ‘ikai te u toe manatua.”   Fakafetaʻi! pea fakafetaʻi! ko e fakamolemole ‘a e ‘Otuá, ‘oku ‘ikai ‘aupito ha angahala ‘e lahi ki ai.  ‘Okú ne tamateʻi pea ‘ikai toe manatua.  ‘Okú ne toʻo mo kaniseli ‘a e “SCARS” ‘oku hunuaki ‘e he Tevolo ‘i heʻetau moʻuí.  Kapau ko ha taha lotomoʻua koe, loto tautea, kapau ‘okú ke lolotonga tōfanga ha faʻahinga tukunga moʻui ‘oku fonu angahalaʻia, kuó u fakalotolahi atu, ‘oku ‘osi māteuteu ‘a e ‘Otuá ke ne fakamolemole hoʻo angahala.  Ko e ‘uhinga ia naʻe pekia ai ‘a Sīsú ‘i he kolosí.  Ko e fakahāʻi ‘a e ‘ofa lahi ‘a e ‘Otuá kia koe mo aú (Loma 5:8), lolotonga ‘e ta ke i angahalá.  Fakatōmala pea ke fakaafeʻi ‘a Sīsū ki hoʻo moʻuí.  Ko Sīsū pe te ne toʻo ‘a e “SCARS” he loloto ‘ene ofá mo e fakamolemolé.  ‘Oua naʻá ke fakakaukau ‘e lava ‘e he paʻangá, tuʻunga fakaakó pe ko ha toe meʻa ke ne tatala ‘o e tōiʻi angahalá.  ‘E kei “SCAR” pe kaeʻoua leva kuó ta tukulolo ‘o foaki ‘eta moʻuí maʻa Sīsú.  ‘Oku talaloto ‘e he Himi 530, “‘E Fufulu au ho taʻataʻá pea u hinehinaange he sinou”.

Posted on Monday 28th of November 2016 11:35:58 AM