Ako ke ta'ofi fakamamahí kakai fefiné
PACMAS

Naʹe fakahoko ha ako ʹaho 3 ʹi he Televisone Tonga ʹo fekauʹaki mo hono fakaloloto ʹa e ʹilo ʹa e kau faiongoongo ʹi Tonga fekauʹaki mo hono fakasiʹisiʹi pea ʹoua ʹe toe tokoni ki hono fakalahi ʹa e ngaahi ongoongo tene toe fakatupunga ai ʹa hono fakamamahiʹi ʹo e kakai fefiné. Ko e ako foki ko eni naʹe kau mai ki ai ʹa e puleʹangá, pehē ki he ngaahi Siasí, Polisí, Ngaahi Kautaha tokangaekina hono fakamamahiʹi e kakai fefiné.

Pea naʹe toe kau atu foki mo e ngaahi kautaha ongoongó fakalotofonua pea pehē ki he Siasí Katolika mo e Uesilianá. Ko e ako ni naʹe kau mai ki ai mo e fakafofonga mei he PACMAS (Pacific Media Assisstance Scheme)

ʹI he fakakaukau ʹo e akó ko e ngāue eni ke fakafehokotaki ʹa e ngaahi kautaha faiongoongó mo e ngaahi Vaʹa Fakamatala mei he puleʹangá kae pehē ki he ngaahi kautaha tokangaekina ʹo e kakai fefiné ke fakalolotoʹi ʹa e ʹilo mo hono siofi ʹa e ʹuhinga mo e tupuʹanga ʹo e fakamamahi mo hono fakamavahevaheʹi ʹo e tangatá mo e fefinē pea ʹe ʹikai ke tukuhifo ai kinautolu ʹi he ngaahi ongoongó

 Ko e ngaahi ʹilo mei he ako ko eni tene  fakamalohiʹi ʹa e ngaahi pou tuliki ʹo e faiongoongó mo e hono lipootí pea toe pehē foki ke faofaoʹi ʹa e ʹilo ʹa e tokotaha faiongoongó.

ʹE malava ai ke tonu ʹa e fakahoko ʹe ha tokotaha faiongoongo ʹa ʹene kumi ki he ngaahi Vaʹa felalaveʹi mo ha palopālema ʹoku hoko. Pea ʹe malava ʹi he ongoongo ʹoku tuku mai kene liliu ai ʹa e tuʹunga fakakaukaú ʹi he sosaieti mo e puleʹanga pea aʹu foki ki he levolo maʹolunga tahá pea aʹu atu foki ki he Pasifiki hono teke ko ia ʹa e fakakaukau ʹo e Gender Equality.

Ko e taha ʹa e ʹisiu naʹe ʹohake ʹi he ako ko e pehē ʹoku hoko ʹa e fakakaukau mo e fefine mo e tangatā kene hanga ʹo vahevaheʹi ai ʹa e faingāmalie.

Ne toe lave foki ʹa e ako ki he palopālema ʹo e taa mo e fakamamhiʹi ʹo e kakai fefiné pea ko e fakamatala ʹoku maʹu ko e taha ʹa e ʹuhinga ʹoku taa ai ʹe he kakai tangatá honau fanga malí ko e FUAʹA. Ko e fehuʹi leva ko e hā ʹa e faitoʹo ʹo e fuaʹa?

Naʹe ʹohake ʹa e ngaahi vahevahe kehekehe mei he kau akó pea ʹoku mahino koe lahi taha ʹo e palopālema ko e ngaahi mali ʹoku hū loto ʹa e fuaʹa pea ʹoku hoko ia ko e palopālema ki he nofo mali.

Ko e ako foki eni naʹe fakalele ia ʹe ʹOfa Guttenbeil Likiliki pea tokoni mai ki ai ʹa e PACMAS mo e Letio Tonga.

Posted on Monday 28th of November 2016 11:50:03 AM