Tukuaki'i ne tō 'i tahi 'ikai 'ilo ki ai toenga 'o e kau toutaí
Mole 'I Tahi

Kuo teʹeki pē ke ‘ilo ‘a e sino ‘o e matāpule taʹu 39 naʹe tukuakiʹi ‘o pehē naʹe tō ki tahi mei ha vaka toutai ko e FV Kelly lolotonga ‘enau fononga atu ‘o toutai ‘i he Potu tahi ‘o Vavaʹú ‘i he uike siʹi ne toki maliu atú.

Naʹe fakahā mei he kau Polisí, ko e matāpulé ni ko Vānisi Tulahe mei Maʹufanga pea naʹá ne heka he vaka toutai ko ení mo ha toko 4 kehe pea naʹa nau mavahe atu mei he uafu Fāuá ‘i Nukuʹalofa ‘i he ‘aho Tokonaki 15 ‘o ‘Okatopá.

Naʹe toki fakatokangaʹi hake ‘e he toenga ‘o e kau toutaí ‘i he ‘aho pongipongi Tūsite 18 ‘o ‘Okatopá ‘a e ‘ikai ‘iloa ‘a e pekiá ‘i he vaká pea naʹa nau mahaloʹi naʹá ne tō ki tahi lolotonga ‘oku nau maʹu mohe kinautolu he pō Monite 17.

Naʹá nau toe foki ai ‘o kumi ‘a e tokotahá ni pea ko e fakamulitukú ia ‘o pehē ngalingali naʹá ne tō ki tahi lolotonga ‘enau tukufolau mai he kaupōʹuli ‘o e efiafi Mōnité

“Na‘e fai 'a e lipooti ki he Tonga Coastal Radio 'o report mai mei he Coastal Radio ki he kau Polisi.”

“Ko e location naʹe 'i ai 'a e vaka ko e mailetahi 'e 56 mei he Tokelau Hihifo 'o Vava'ú. Na'e mahino na'e fu'u kovi 'a e tahí pea na'e toki foki mai ai 'a e vaka toutaí 'o tau mai ki Nuku'alofa 'i he hengihengi Sapaté.” Ko e fakahā eni ‘e ha fakafofonga mei he kau Polisí

Naʹe fakahā ‘e ha kāinga ofi ‘o Vānisi ki he Keleʹá, ‘oku teʹeki ke ne maʹu hoa pē maʹu fāmili.

Posted on Monday 28th of November 2016 11:53:22 AM