'Ikai ha hu'uhu'u ki he mate tangata toutai 'Initonēsia he uafu Tu'imatamoaná
Mole 'i Tahi

Kuo kakato ‘a e ngāue ki hono sivi ‘a e sino ‘o e pekiá, ‘a ia ko ha matāpule taʹu 30 ko Roys Gita mei ‘Initonēsia naʹe tukuakiʹi naʹá ne melemo mei haʹane tō mei he vaka toutai naʹá ne ‘i aí ki tahi ‘i he uafu Tuʹimatamoaná he efiafi Falaite 30 ‘o Sepitemá.

Hili hono sulá, naʹe fakapapauʹi mei ai naʹe ‘ikai ha faʹahinga ‘uhinga kehe naʹe tupunga ai ‘a e mate ‘a e tangatá ni ka ko e melemo pē.

Ko e puipuituʹa ‘o e meʹa naʹe hokó fakatatau ki he fakamatala kuo tuku mei he kau polisí, ko e taha eni ‘o e kau toutai he vaka toutai Siaina ko e Yushun. Ko e taimi ko ení ko e pekiá pē mo ha tokotaha naʹe ‘i he vaká pea naʹá ne huʹakavaʹia ‘aupito. Naʹá ne feinga ke hifo mei he vaka Yushun ki ha toe vaka ‘e taha naʹe noʹo pē he tafaʹakí ‘a ia naʹe ‘i ai ‘a e toenga ‘o e kau toutaí.

Fakafuofua ki he taimi 11:00pm ‘o e efiafi ko iá naʹe fanongo ai ‘a e ni’ihi ‘o e kau toutaí ki ha meʹa ‘oku patū ki tahi ka ‘i heʹenau fakavave ke vakaiʹí, naʹe ‘ikai malava kenau toe sio ki ai he kuo ngalo hifo ia ki he kilisitahí.

Naʹe fai leva ‘a e ui tokoni fakavavevave ki he kau polisí fakataha mo ha feinga ha tokotaha uku ke ukufi hake hono sinó, ka naʹe ‘ikai malava ke maʹu he efiafi ko iá. Naʹe toki maʹu hake hono sinó ‘i he ‘aho hono hokó (1 ‘o ‘Okatopá) ‘i he feituʹu pē naʹe mahaloʹi naʹá ne tō ai ki tahí.

Kuo ‘osi fakafoki atu hono sinó ki ‘Initōnesia ki hono fāmilí ke toki fakahoko hono meʹafakaʹeikí

Posted on Monday 28th of November 2016 11:56:14 AM