Masalai pē puha moá te'eki ke a'u ki ha 'Aisi
Puha moa Vava'u

Naʹe maʹu ʹe he Keleʹá ha fakamatala mei Vavaʹu ʹo pehē, ʹoku kiʹi fakaofo ʹa hono  fakatokangaʹi ʹa e ngaahi founga ʹoku ʹoatu ʹaki ʹa e ngaahi puha moa ʹa e ngaahi falekoloa ʹEsia mo falekai ʹi Vavaʹú.

Ko e founga eni hono ʹomai  ʹaki ʹo e ngaahi  puha moa ki Vavaʹú  ʹi he taha ʹo e ngaahi vakatahí ʹo tukuakiʹi ko e Niuvakai.  Fakamatala ki he Keleʹá ʹo pehē ne ʹi ai ʹa e uta naʹe ʹave ki Vavaʹu he efiafi Tusite (uike atu ʹaho 6 ʹo ʹOkatopá ni) fakafuofua ki he taimi 8 efiafi ʹo mavahe mei Nukuʹalofa pea tau ki Vavaʹu ʹi he hoko ʹa e 8 pongipongi Tuʹapulelulu.

Pehē ʹi he fakamatala mei he Vaʹa ʹo e Keleʹá ʹi Vavaʹú, naʹe hā mai ʹa hono peki fakataha pē ʹa e ngaahi puha moá ʹi ha ngaahi pāleti pea ʹosi milemilaʹi tākai pea ne tuku pē fakahifo pē he funga Uafu Puatalefusí pea toki ʹave fakafuofua ki he taimi 12 hoʹata kuo aʹu ki he masalai ʹi he fakahā mei Vavaʹú.

ʹOku ʹikai ke hā ha hingoa ʹoku tohi pē ʹave ki ai ʹa e ngaahi uta puha moá. Ka koe fakamatala ʹoku maʹu koe ʹave ki he falekai. Ko e fehuʹi leva koe hā naʹe ʹikai ke faʹo ai ʹi he ʹaisi? Naʹe aʹu ki Vavaʹu ʹoku kei poloka pe naʹe fuoloa pē ʹene vaia ʹa e puha moa?

Ko e fakahā foki mei he Potungāue Moʹuí fekauʹaki mo e koloa ʹaisí, ko ʹene toʹo pē kituʹa mei he ʹAisí pē koniteiná ʹo molū pea toe fakafoki ki he loto ʹaisí, ʹoku ʹosi taimi ke fakaʹauha ʹa e kalasi puha moa ʹoku tauhi pehē. ʹI hono ʹave ʹo e ngaahi puha moá ʹoku ʹiai pē ʹa e tuʹutuʹuni ki he malohi ʹo e momoko ʹe tauhi ʹaki ʹo e koniteiná. Pea kapau ʹoku fakaheka pē ʹo kofu ʹaki ʹa e milemila ke maʹu ʹa e poloká pea toe tuku ʹi he laʹaá ʹoku tuʹu ia he fehuʹia ʹaupito.

Ka koeʹuhī ʹoku hā heni naʹe ʹikai ke pehē, ʹoku tuʹu fehuʹia leva ʹa e malu ʹo e koloa ko eni hono fakataua atu ʹi Vavaʹu ki he kakai ʹo e fonuá. Pē ko hono ngaohi ʹaki ha meʹakai ke maʹu meʹatokoni mei ai ʹa e kakai ʹo Vavaʹu.

Ko e lava ē ʹa e meimei houa ʹe fāngofulu tupu ʹa e nofo ʹa e puha he mafana mo e tahitahi ʹo e vahanoa pea toe fakahifo ʹo nofo he meimei houa ʹe 4 ʹi he laʹaá ʹi he efu ʹo e Uafú pea toki ʹave. ʹOku kei tonu koá ʹa e faʹahinga founga pisinisi ko eni pē ʹikai?  

Posted on Monday 28th of November 2016 11:56:59 AM