'Asi kaiha'a fakakengi 'i Tongá ni

Kuo toloi mai ʻa e hopo tukuakiʻi ʻo ha kulupu toʻutupu kau ki ai mo ha ongo finemui naʻá nau hū taʻefakalao ki ha loto falekoloa Siaina ʻi ha ʻaho Sāpate ʻo haʻi ʻa e mamahí ka e fakahoko ʻenau kaihaʻá mo maumauʻi ʻa e loto falekoloá. Naʻe kole ai mei he Talatalaaki ʻa e kau Polisí ʻInisipēkita Saimone Fifita ke to e ui mai ʻa e hopó ki he mahina ko Fepuelí ka e lava ke ʻomai ngaahi fakamoʻoni ke  tokamālie.

Ko e kau talavou ʻoku tukuakiʻi ki he hia kaihaʻa fakamālohí ʻoku taki mai ai ʻa ʻAmoni Fifita ʻo Kanokupolú, Leiʻataua Foliaki ʻo Pahu, Kaumāvae Fakaanga mei Tokomololo mo e ongo finemui ko Akosita Motuliki ʻo Hōfoá pehē kia Tupou Fau ʻo Puké.

Ko e tokotaha pē ʻi he kau tukuakiʻí ko Fakaanga ʻoku ʻiai ʻene Fakafofonga Lao ke ne taukapoʻi ia he fakamaauʻangá pea toenga ʻoku teʻeki ke mahino pē ʻoku nau to e kumi loea.

Naʻe ui hake ʻa e hopó ʻoku ʻikai ha taha ʻe maʻu hopo he kau tukuakiʻí ka naʻe kole ʻe ʻInisipēkita Fifita ko ʻAmoni Fifita pē ʻoku tauhi fakalao ʻi Huʻatolitoli ka ko e toengá ʻoku ʻosi maluʻi kinautolu ki honau takitaha ʻapi kenau toki lava mai ki he ʻaho hopó. Naʻe fakahā ʻe he Fakamaaú ki he Talatalaakí ke fakamahino ki he kau tukuakiʻi kenau lava mai ki he ʻaho hopo ʻi he taʻú ni he kapau tenau kei liʻaki hopo ʻe toki puke kinautolu ʻo tauhi pilīsone.

Ka e fakatatau ki he puipuituʻa ʻo e hia naʻe fakahokó ʻi hono fakahā mei he kau Polisí, “Ko e pisinisi naʻe fakahoko ki ai ʻa e hiá ʻoku tuʻu ia ʻi lalo he falefungavaka ʻoku ʻiai ʻa e falehulohula foʻou ko e Kalapu Ladies feʻungatonu mo e Hala Taufaʻāhau. ʻI he ʻaho Sapate mahina ko ʻOkatopa ʻo e tau 2016 naʻe lolotonga nofo ʻa e mamahí ʻi he loto pisinisí ko e leʻo.

Ka e fakaʻohovale  ʻa e ʻasi atu ʻa e niʻihi he kau fakaʻiloá pea tukuakiʻi naʻe hanga ai ʻe he ongo finemui kiʻi taʻolungaʻi ke tohoakiʻi tokanga ʻa e matāpule mamahí.

“Ka naʻe hoko ʻene tokanga ki he hulá pea hangaatu ai ʻe he toenga ʻo e kau tukuakiʻi ʻo haʻi hono nimá mo e vaʻé pea tepiʻi mo e ngutú ke ʻoua naʻa lava ui tokoni. Ka e toki fakahoko leva ʻenau fiemaʻú ʻo kaihaʻasi ʻa e ngaahi koloa ʻo faʻo ʻi he milemila mo e tangai ʻonau hola mo ia. Ka e kimuʻa pea nau holá naʻe tukuakiʻi kia ʻAmoni Fifita ki heʻene fahi ʻa e misini komipiuta ʻoku tauhi ai ʻa e lēkooti ʻo e meʻafaitā he loto falekoloá  peá ne toki lī fakakengi mai ki he meʻafaitaá.

“Naʻá nau tuku hola ko ia mo e ngaahi koloá pea toki feinga ʻa e mamahí ʻo ui tokoni ngāue atu kau Polisí ki he feituʻu naʻe hoko ai ʻa e hiá. Naʻe haʻu ʻa e mamahí ʻo vakai hake ʻa e misini naʻe fahí ʻoku maumau ka ko e kaati naʻe ʻi he loto mīsini ʻoku tauhi ai lēkooti faitā ʻo e loto falekoloá ʻoku kei maau lelei pē. Naʻe siofi ai ʻo maʻu ʻa e fofonga ʻo e kau tukuakiʻí pea fakahoko ai ʻe he kau Polisí ʻa e kumi vave ʻo tānaki mai kulupu ʻo tauhiʻ i pilīsone.”

ʻOku tā tikite ʻa e kau tukuakiʻí ki he kaihaʻa fakamālohi ʻa e tokoua pea kaungā hia atu ʻa e toko 3 ka ko ʻAmoni Fifita ʻoku tukuakiʻi ko ia naʻe taki he kulupu ko ʻení ki he kaihaʻa fakamālohí. Ko e hingoa ʻeni ʻoku lahi hono tukuakiʻi ki he ngaahi hia fakatokolahi pea lahi ke tauhi fakalao ʻi pilīsone fekauʻaki mo ha ngaahi tukuakiʻi kehe.

Posted on Monday 9th of January 2017 11:11:36 AM