Ta'efalala'anga nai 'a Feleti Sevele?

Kuo toki mapuna hake eni ʹa hono tukuakiʹi ʹo Lord Sevele ki he taʹefalalaʹanga ʹi he taimi naʹe kei Sea ai ʹi he Poate Taulangá pea ko e taimi eni naʹe Palemia aí. Ko e tukuakiʹi eni ʹe he kau mēmipa ʹo e Poate Taulangá ʹo hā ai ʹa Richard Prema, Malakai Tapealava, Fine Tohi, ʹEtuate Sakalia mo Komanitā Lupeti Vī. ʹI he tuʹuakiʹí naʹa nau fakahū atu ai ʹenau tohi tangi ki he Tuʹí Siasi Tupou V ʹi he ʹaho 1 ʹo Tīsema 2009.

Tukuakiʹi

Ko e ngaahi fakamatala eni mei he Tohi Tangí ʹi he fakamatala ʹa e Poate Taulangá (liliu fakatonga)- “ ʹOku matuʹaki puleʹi pē ʹe he Sea (Sevele) ia ʹa e Poaté pea ʹi he taimi lahi ʹoku ne tuʹutuʹuni pau pē ʹe ia ʹa e meʹa ke fakahoko ʹe he Poaté. ʹO aʹu ki ha tuʹunga ʹoku fepaki ʹene ngaahi tuʹutuʹuni mo hono lākanga koe Sea.

Liliu Miniti Fakataha

Taimi ʹe niʹihi ʹoku liliu ʹe he Sea ʹa e miniti ʹo e ngaahi fakatahá ʹa e Poaté ʹo ʹikai ke ʹilo ki ai ʹa e toenga ʹo e kau mēmipá ʹo e Poaté. Naʹe kau heni ʹa e pepa talamahuʹinga ki hono fakatau/lisi atu ʹa e konga ʹo Uafu Kuini Salote. Naʹe fakamoʹoni kotoa ʹa e kau mēmipa ʹo e Poaté ʹi he tohi naʹe ʹavé holó ʹia nautolu, ka naʹe liliu tokotaha pē ia ʹe he Sea pea ne fakamoʹoni ai ʹikai ʹilo ʹe he toenga ʹo e kau mēmipa ʹo e Poate ʹa e ngaahi liliu naʹa ne fakahokó.

Taimi ʹe niʹihi naʹe tuʹutuʹuni ʹa e Sea ke liliu ʹa e miniti ʹo e ngaahi fakatahá ʹe niʹihi ke fakahā ʹa e ngaahi meʹa naʹe ʹikai ke aleaʹi ʹi he ngaahi fakataha ko iá.

Naʹe liliu ʹe he Sea ʹa e ngaahi ngāue ʹa e Maʹu Mafai ki he Taulangá naʹe ʹosi fokotuʹutuʹu, ʹikai kene tomuʹa fakataha ki ai mo e Poaté pē koe ʹofisi ʹo e pule ʹo e Maʹu Mafai ki he Taulangá. Fakatātāʹaki eni ʹa e palani ki he konga ʹo e Uafu Kuini Salote ki he folau fakalotofonuá.

Uafu Vuna

Naʹe tuʹutuʹuni ʹa e Sea ke fakahoko ʹe he Maʹu Mafai ki he Taulangá ʹa e ngaahi ngāue ko iá, ʹo fepaki ia mo e founga angamaheni(naʹe ʹosi fakahā ʹe he ʹanalaiso ʹo e ngaahi mole pē lelei ʹa  hono fakahoko ʹa e ngaahi ngāue ko ia, ʹe ʹaiki ke maʹu ha tupu mei ai) Naʹe fiemaʹu pē ʹe he Sea(Sevele) ke fakahoko ʹa e ngaahi  ngāue ko ia neongo naʹe mahino ʹoku ʹikai ha paʹanga feʹunga ke fakahokoʹaki.

ʹI he konga leva ʹo e ongo palakalafi fakaʹosi ʹo e Tohi Tangi naʹe pehē ai. “ Ko e ngaahi meʹa ʹoku hā atu ʹi ʹolungá koe ngaahi fakatātā ʹo e ngaahi ngāue naʹe tuʹutuʹuni ʹe he Sea. ʹOku ʹikai ke toe ʹiai haʹamau falala ki he taki ʹa e Seaʹo e Paoté pea ʹoku mau kole heni,fakafoʹituitui mo fakakatoa ke fetongi ʹa e Sea.

Toʹonga Tikitato?

Ko e meʹa ʹe taha ʹoku ne fakahā mahino ʹa e toʹonga fakatikitato ʹa e Sea, ko ʹene taʹeloto ke tukuange ʹa e lakangá ʹo e Sea hili ia naʹe ʹosi fakahoko ʹe hono puleʹangá ʹa e tuʹutuʹuni ngāue ke ʹoua ʹe toe mēmipa ha taha ngāue fakapuleʹanga ʹi he ngaahi Poaté ʹo e ngaahi pisinisi ʹa e puleʹanga ʹi he ʹosi ʹa e taʹu 2008. Ko e ʹalu eni ke ʹosi ʹa e taʹu 2009 ʹoku kei Sea pē ʹa Dr Feleti Sevele ko e Palēmiá

Tohi ʹa ʹAisea Taumoepeau ʹo fakahā ʹoku Takihalaʹi ʹe Seaá e Poaté

Ko e tohi eni ʹa  ʹAisea Taumoepeau ko e Loea ʹa e Poate Taulangá he taimi ko iá ʹo fakahā ai ʹoku Takihalaʹi ʹe he Sea ʹa e Poate… “ The apparent misleading of the Board by the Chairman on the meeting of 16 August 2007 exposes the Chairman to an even higher degree of liability than any other members of the Board.”

Naʹe fakahā ʹe ʹAisea ʹene tohi ko ‘eni kia Komanita Lupeti Vī ʹi he ʹaho 28 ʹo ʹOkatopa 2008. Pehē ʹi heʹene tohi ʹoku ʹikai ʹa e ngaahi fakamatala ʹoku ne ngāueʹaki ʹoku tō fefeka ka ko ʹene feinga ke fakamamafaʹi ʹa e mafatukituki ʹa e ngaahi ngāue naʹe fakahoko ʹe he Sea (Sevele).

Kou fakaʹamu ko hono fakamamafaʹi atu eni ʹe tokoni ki hono fakapapauʹi ʹe fakahoko ʹa e ngāue ʹa e Poaté fakalao pea ke maʹu foki ʹa e pule leleí.

Fakalelei ki he Uafu Vuna

Pehē ʹe ʹAisea ko e fakamatala naʹe fakahoko ʹe he Sevele ʹi ha fakataha naʹe fakahoko ʹi he ʹaho 16 ʹo ʹAokosi 2007 ʹoku ʹikai haʹane makatuʹunga pau ʹi hono fakahoa ki he tohi ʹa e Minisitā Paʹanga ʹi he ʹaho 7 ʹo Siulai 2008. Ko e minisitā he taimi ko eni ko Hon Siosiua ʹUtoikamanu.

Kaekehe ʹi he tohi ʹa Siua naʹa ne pehē ai “ Felaveʹi mo e fakalelei ki he Uafu Vuná, ʹoku ʹikai keu sio ki ha tuʹutuʹuni ʹa e puleʹangá ki he Poate Taulangá ke fai ha fakalelei. Pea ʹoku ʹikai ha tokoni fakapaʹanga pau ki he poloseki ko eni. Neongo ia ʹoku feinga ʹa e puleʹanga ke kumi ha tokoni, ka ko ʹene aʹumai ki he lolotongá (taimi koi a) ʹoku ʹikai ha paʹanga…”

ʹI he lau leva ʹa ʹAisea Taumoepeaú, ʹoku ʹohake leva ʹa e fehuʹi pē koe hā ʹa e ʹuhinga naʹe ngāue ai ʹa e Poate ki ha tuʹutuʹuni ʹoku ʹikai hano makatuʹunga fakapaʹanga pau. Kaekehe ne hoko ʹa e tuʹutuʹuni ko eni ke tukuakiʹi ai mo e memipa ʹo e Poate ne nau taʹetokanga.

Tuʹutuʹuni Sea Poate ke tānaki paʹanga kaungāue Hala ki he Tuʹi (Hilifaki Kalauni)

 ʹI he tohi ʹa ʹAisea naʹa ne toe pehē ai he konga ʹene tohí, naʹe hala ʹa hono tuʹutuʹuni ʹe he Sea ke tānaki paʹanga ʹa e kaunāue (Hala ki he Hilifaki Kalauni Siaosi Tupou V)

Fetuʹutaki kia Feleti Sevele

Koeʹuhī koe ngaahi tukuakiʹi ko eni naʹe feinga ai ʹa e Keleʹa ki he Palēmia malōlō ke ʹomai haʹane tali ki heni. Kaekehe hili ʹa e toutou feinga telefoni ki honau ʹofisi Tonga Pacific Games ʹoku tuʹu ʹi Otto Sanft moe ʹikai ke tali mai. Naʹe aʹutonu ʹa e Keleʹa ke fakaʹekeʹeke mo Sevele. Kae pangó naʹe ʹikai kene tali ke fai ha fakaʹekeʹeke hili hono fakahā atu ʹa e kaveinga ʹoku fai ai ʹa e talanoá. Naʹe feinga ʹa e Keleʹá ki ha ʹimeili mo ha telefoni ka naʹe fakahā ʹe taʹahine ngāue ai ʹoku ʹikai ke ngofua ke tuku mai.

Naʹe ʹomai pē ʹa e ʹimieli ke fetuʹuange ki ai kae toki fakahā kia Feleti Sevele pea koe ʹave eni ʹa e Keleʹá ʹo paaki he taʹu foʹou ʹoku ʹikai pē ke ongona mai.

‘Oku ‘i ai e tui mahalo ‘oku kau ‘a e fakamatala ‘oku ha atu ‘i ‘olunga ‘i he ta’eloto ‘a e Palemia ‘o e ‘aho ni, Samuela ‘Akilisi Pohiva, ko e Sea ia ‘o e Governance and Audit Committee, ko e fo’i sino fakalao ‘eni ‘oku ne siofi mo tokanga’i fakalukufua ‘a e ngaahi teuteu ki he sipoti ‘a e ngaahi fonua ‘o e Pasifiki   ke hoko ‘a e tangata ni, ko e CEO ‘o e Organizing Committee. Ko e Palemia ‘o e ‘aho ni ‘oku ‘i ai ‘e ne ‘ilo lahi ki he natula ‘o e tokotaha ni.


Posted on Monday 9th of January 2017 11:18:14 AM