Fakahaofi vaka meili Albatros kau toutai ‘e toko 6 he vahá

‘Oku moʹui lelei pea malu ‘a e kau toutai Tonga ‘e toko 6 naʹa nau tuku folau atu ‘i he vaka toutai ko e FV Losemani Foʹou ‘o fakahoko ‘enau toutai pea iku hoko ai ha fakaevaha ‘o nau tēkina ai feʹunga mo e ‘aho ‘e 3.

Naʹe ofongi ‘e he vaʹa tautahi ‘a Nuʹusilá, ‘a e kau polisi ‘a Tongá fakafuofua ki he taimi 2:05am ‘o e ‘aho Tokonaki 4 ‘o Fēpuelí fekauʹaki mo ‘enau maʹu ha ui pīkoni kole tokoni mei ha vaka naʹe ‘i he mamaʹo ko e kilomita ‘e 400km mei he fakatongahihifo ‘o Tongá.

Naʹe fokotuʹutuʹu leva ‘e he RCCNZ ‘a Nuʹusilá ‘a e vakapuna P3 Orion ‘a e vaʹa laulāpuna ‘a e Nuʹusilá ke ne fakaʹilongaʹi ‘a e ui tokoni ko ení ‘o malava ai kenau fakatokangaʹi ‘a e vaka mole ko ení ko FV Losemani Foʹoú ‘a ia ko ha vaka toutai Tonga.

Naʹe laku hifo leva mei he vakapuná ‘a e meʹakai, vai mo e ngaahi tokoni fakafaito’o pehē ki ha lētió ke malava kenau fetu’utaki ‘aki mo e vakapuná ‘o toki ‘ilo mei ai ko e palopalemá ko e vaivai ‘a e puha ‘uhila ‘o e vaká pea toe mama.

Ko e kau tangata ‘e toko 6 ‘o kau ai mo e ‘eikivaká ‘a ia ‘oku ‘oʹona ‘a e vaká pea kuo ‘osi ‘a e ‘aho ‘e 3 mo ‘enau tēkina ‘o ‘ikai ha vai kenau inu mei ai.

Kaekehe fakafuofua ki he taimi 5:00am naʹe ui tokoni ai ‘a e RCCNZ ki he vakameili Siamane ko e Albatros ‘a ia na’e ofi atu ‘i he potu tahi ko ení kenau afe hake ‘o tokoni’i ‘a e kau toutai Tonga ko ení. Ko e vaka meili ko ení na’e toki mavahe atu mei Nuku’alofa ‘i he ‘aho Falaite 3 ‘o Fepuelí fakafuofua ki he taimi 6:00pm efiafi.

Ko ia na’e pau ai ke fakatatali ‘a e taumu’a mo e taimi ‘o e vaka meilí ki he taulanga hono hokó ka nau afe hake ‘o a’u ki he FV Losemani Fo’ou fakafuofua ki he 2:30pm ‘o e ‘aho Tokonaki 4 ‘o Fēpuelí.

Na’e fakaheka kotoa ‘e he vakameilí ‘a e toko 6 ko ení pea na’e fai hono sivi kinautolu ‘e he toketā ‘o e Albatros ‘o fakapapau’i ‘oku nau faingamālie mo mo’ui lelei kotoa pē.

Na’e tuku folau ai pē ‘a e kau toutaí he vakameilí ki ‘Okalani Nu’usila ‘onau toki hifo ai ke nau toki foki mai ki Tongá ni ke fe’iloaki mo honau ngaahi fāmilí.

‘Oku te’eki fakapapau’i pē na’e toho fakataha ai pē mo ‘enau vaká pea na’e li’aki ai pē ia ‘i he vahá.

Hao mo’ui mo e toko 8 ‘i he vaka toutai FV ‘Elenoa 1 ‘i Vava’u

Taimi tatau na’e toe ma’u ‘e he RCCNZ ha toe ui tokoni ‘e taha mei ha vaka toutai Tonga ai pē pea na’a nau fakahoko ‘a e fakamatala ko ení ki he kau polisi ‘a Tongá ‘i he ‘aho Falaite 3 ‘o Fēpuelí ko e vaka FV ‘Elenoa 1.

Na’e mahino ko e palopalemá na’e hoko ia ki he mīsini ‘o e vaká fakafuofua ki he mile ‘e 20miles mei he fakatonga ‘o Vava’ú. Ko e toko 8 na’e folau aí fakataha mo e ‘eikivaká.

‘Oku mahino foki ko e efiafi Falaité na’e angi mālohi ‘a e tahí pea hakohako pea na’e faingata’a ai ki he kau toutai ko ení kenau foki ki Neiafu.

Na’e fai ‘a e feingá pea mavahe atu ha vaka toutai ‘e taha ke haofaki’i mai ‘a e kau toutai ko ení, pea na’e ‘ikai pē malava he na’e hou ‘a e tahí pea iku ai ‘o toe foki ‘a e vaka ko ení ki Neiafu. Na’e toe ‘aliaki ‘a e vaka tatau pē ‘i he ‘aho hono hokó ‘o malava ke ne a’u ki he vaka molé ‘o toho ki Neiafu, pea ko e toko 8 na’e faingamālie kotoa pē mo mo’ui lelei.

Na’á na tu’uta ki Neiafu fakafuofua ki he taimi 4:50pm ‘o e ‘aho Tokonaki 4 ‘o Fēpuelí.

Mafuli vaka ‘i he muitolotolo ‘o Sopú

Na’e mālō pē ‘o ‘ikai ‘i ai ha mo’ui ‘e mole ‘i ha toe fakaevaha ‘e taha na’e hoko ‘i he ‘aho Tokonaki 4 ‘o Fēpuelí ‘a ia ko ha vaka na’e mavahe mei Nuku’alofa ‘o taumu’a ki he motu ko ‘Atatatā.

Na’e ‘i he vaká ni ‘a e kau pāsese ‘e toko 6 pea na’e mafuli ‘enau vaká tupu mei he peau lalahí ‘o ofi atu ‘i he potu tahi ‘o Sopú.

Na’e vave ‘a hono fakahaofi ‘a e fa’ahingá ni ‘e he kau polisí ‘o fakaheka ‘a e toko 4 ‘o e kau pāsesé ‘o fakafoki mo’ui kinautolu ki honau ngaahi ‘apí ka ko e ‘eikivaká mo ha taha ‘o ‘ene kau kauvaká na’á ne nofo pē ‘i he feitu’u na’e hoko ai ‘a e fakatamakí ke toho ki ‘uta ‘ena vaká.

Ko e fakaevaha ko ení na’e hoko ia fakafuofua ki he taimi 10:0am ‘o e pongipongi Tokonakí.

Fakatokanga mei he kau polisí

Kuo tuku foki mei he kau polisí ha fakatokanga mo ha ekinaki ki he kakai ‘o fonuá ke toe tokanga ange mu’a ki he ngaahi fiema’u pau ki he ngaahi me’angāue mo e tu’unga taau ‘o e ngaahi vaka toutaí kimu’a kenau mavahe ki ‘oseni ‘o fakahoko ‘enau toutaí.

‘Oku kau heni ‘a e ngaahi naunau hangē ko e sāketi fakahaofi mo’ui, me’afana felea ui tokoni mo ha pīkoni pea tānaki atu ki ai mo hono tomu’a fakapapau’i ‘oku malu mo lelei ‘a e vaká ke ne matu’uaki ‘a e ngaahi ha’aha’a ‘o natulá ka ko e me’a mahu’inga tahá ke ‘uluaki vakai’i ‘a e fakamatala’eá kimu’a pea toki makatu’unga mei ai ‘enau fili ke fakahoko ‘enau toutaí.

‘I he faka’osinga ‘o e uiké (‘aho 3-5 Fepuelí) na’e fe’unga mo e ngāue fakahaofi mo’ui ‘e 4 ‘i tahi. Ko e mo’ui kotoa ‘e 21 na’e fakahaofí ka ko e toko taha pē na’e mole ‘ene mo’uí

 

 

 

Posted on Wednesday 26th of April 2017 10:08:45 PM