FAKA’ILONGA’I TA’U TAHA ‘A E PEKIA ‘A E PALEMIA MALOLO – SAMUELA ‘AKILISI POHIVA

Posted: 14-Oct-2020 04:15 PM

Politics

Na’e maloloo ‘a Samuela Pohiva ‘i he ‘aho 12 Sepitema 2019 pea na’e faka’ilonga’i ‘a hono ta’u 1 ‘e he fanau mo e letio Kele’a Voice ‘i he uike kuo ‘osi ‘aki ha ki’i fakafamili ‘a e fanau pea mo ha ngaahi polokalama manatu melie ‘a e kakai na’e fakahoko atu ‘i he letio.

‘Oku faka’amu ‘a e Nusipepa Kele’a ke ‘oatu ai pe ‘a e fakamatala ni ke fakamanatu ‘aki ‘a e ta’u taha ‘a e malolo ‘a Samuela ‘Akilisi Pohiva.

Koe hala fononga kihe liliu fakatemakalati ‘i Tonga

‘I he ta’au ‘o e liliu fakapolitikale fakamamani lahi pea a’u mai kihe tahi pasifiki na’e kau atu aipe mo Tonga ni ‘i he pue ko eni.

Ko e konisitutone ‘a Tonga na’e fakamanava’i ‘e he Tu’i ‘o Tonga Kingi Siaosi Tupou 1 ‘i he ‘aho 4 ‘o Novema 1875 ko e pule’anga fakatu’i ‘i he malumalu ‘o e konisitutone. ‘i he 1975 ko e kakato ia ‘a e ta’u ‘e teau pe ko e senituli ia ‘a e konisitutone ‘o Tonga.

1975:   Na’e fokotu’u ai ‘e Dr Hu’akavameiliku ki he Kapineti ke fokotu’u ha komisoni ke ne siofi mo to e vakai’i ‘a e Konisitutone ‘a Tonga.

1978:   Na’e fakatoka ai ha palani ‘e he ni’ihi ‘o e kau ako ‘i he Univesiti ‘o e Pasifiki Saute ‘i Fisi ke nau fakahoko mo ngaue’i ‘a e fokotu’u ‘a Dr Hu’akavameiliku. Na’e kau ki heni ‘a Samuela ‘Akilisi Pohiva, Lopeti Senituli, Finau Tutone, ‘Uhila Liava’a, Sione Ma’ilei, Tevita Kolokihakaufisi, Havea Katoa mo Sonasi,

1979:   Na’e ‘osi ai e ako ‘a ‘Akilisi pea ko ia na’e fuofua foki ki Tonga ‘o hokohoko atu hono talanoa’i ‘a e fakakaukau na’e fokotu’u ‘e Dr Hu’akavameiliku. Na’e to e tokolahi ‘a e ni’ihi na’a nau to e kau mai ki hono talanoa’i ‘o e fakakaukau ni kau ai ‘a e kau ako ‘Atenisi mo e kakai kehekehe pe.

1981:   Fokotu’u ‘e ‘Akilisi ‘a e polokalama letio MATA-LAFO-LAU-KAI, lolotonga eni ‘oku fakahoko fatongia ‘a ‘Akilisi ko e faiako ‘i he Ako Fakafaiako - Teacher’s Trainning College.

1984:   Polokalama faka’osi ‘o e ta’u na’e tuputamaki ai ‘a e Hou’eiki Kapineti, na’e kau ki he polokalama ko eni ‘a ‘Akilisi Pohiva, Havea Katoa, Rev. Dr. Sione ‘Amanaki Havea pea mo ‘Ilaisa Futa Helu.

1985:   Tu’utu’uni ‘a e Kapineti ke fakamaloloo’i ‘a ‘Akilisi Pohiva mei he ngaue fakapule’anga pea fakangata hono to e tukuange atu ‘a e polokalama MATALAFOLAUKAI.

Kamata hono fakama’opo’opo mai ‘e ‘Akilisi ‘a e kau mo’unga’i tangata ke nau ngaue fakataha ‘i hono vakai’i ‘a e konisitutone kuo ta’u teau ‘a hono motu’a. Na’e kau ki heni ‘a Professor Futa Helu, Dr ‘Amanaki Havea, ‘Epikopo Patelesio Finau, Rev Siupeli Taliai, Sione Latukefu mo ha ni’ihi kehe pe.

1986:   ‘I Siulai, na’e fanau’i ai ‘a e Nusipepa Kele’a ke ne hoko atu ‘a e ngaue ‘a e polokalama letio MATALAFOLAUKAI ‘o kamata tufaki ‘i Tonga ni tu’otaha ‘i he mahina.

Ko e lau eni ‘a Michael Pullman he NZ Herald, Oct 1,

“Two years ago ‘Akilisi and some friends who had met regularly for sometimes decided on the bold step of launching of a critical monthly newspaper Kele’a was born and quickly set tone for changes to come”

1987:   Fuofua fili ‘e he kakai ‘a Samiuela ‘Akilisi Pohiva ki he Fale Alea ‘o hoko ko e fakafofonga Fika 3 ‘o e kakai ‘o Tongatapu.

Ko e Kau Fakafofonga eni ‘a e kakai ki he Fale Alea he ta’u 1987:

Tongatapu: 1. Mate ki he fuka Lemoto, 2. Laki Niu, 3. Samiuela ‘Akilisi Pohiva

Vava’u: 1. Samiu Vaipulu, 2 Hopate Sanft

Ha’apai: 1. Viliami Afeaki, 2 Teisina Fuko

Niua: 1. ‘Aminiasi Pau’u

‘Eua: 1. Lilo Vaka’uta

1988:   Laka tokotaha ‘a ‘Akilisi ki he Tu’i, Taufa’ahau Tupou IV ‘o ‘ave ‘a e tohi tangi ke fai hono vakai’i (review) ‘a e Konisitutone mo e ngaahi peesi poupou ‘e 60. Na’e fakamalo’ia’i heni ‘a Akilisi ‘e he Tu’i pea ne folofola ange ‘e tuku ki he Pule’anga ke nau ngaue ki ai.

1989:   Faka’ilo ‘e ‘Akilisi ‘a e Pule’anga ko hono fakatau ta’efakalao ‘a e paasipooti Tonga (1986-1990)

Foaki ta’efakalao tangata’i fonua Tonga mo e paasipooti Tonga ‘e 426 ki he kau Siaina, kau ai Famili Marcos ‘i he Diplomatic Passport

Uike 1 kimu’a he hopo paasipooti na’e tu’utu’uni (Royal Command) ‘a e Tu’i, Tupou IV ke ui ha fakataha Fale Alea ke fakalao’i ‘a e fakatau ta’efakalao ‘o e paasipooti

Pehe ‘e Malcolm Pullman mei he NZ Herald, 1991,

Panicked by the crisis, the government hastily convened an emergency session of parliament in February and legalised passport sales to 426 foreigners by changing the constitution. But the moral victory belongs to Pohiva

1992:   Fakahoko ai ha fuofua Konivesio ki he Konisitutone mo e Temokalati, na’e fakahoko ‘i Novema 24-27, ‘i Pasilika ‘o Sangato ‘Atonia Patua. Nuku’alofa. Na’e lau heni ha pepa ‘a Guy Powels. “The Kingdom of Tonga's path to democracy”

Fokotu’u ai ‘a e Democracy Movement

1996:   Fakahu pilisone ‘a Samiuela ‘Akilisi Pohiva, Kalafi Moala (Faipulusi Taimi ‘o Tonga) mo Filo ‘Akau’ola (‘Etita Taimi ‘o Tonga) ‘i he ‘aho ‘e 24 ko ha tu’utu’uni fakahu pilisone ‘aho 30 ‘o kau ai ‘a e fakahu pilisone malu. Ko hono tautea’i eni ‘e he Fale Alea ‘a e toko tolu ni ‘i hono tukuaki’i ko e anga ta’efaka’apa’apa ki he Fale Alea ‘i hono paaki ‘i he nusipepa Taimi ‘o Tonga ha fakamatala fekau’aki mo e faka’ilo fakafalealea (impeachment) ‘a e Minisita Lao.

            Na’e toki faka’ataa ‘i he tu’utu’uni ‘a e Fakamaau Lahi Nigel Hampton ‘i he’ene pehe na’e maumau’i ‘e he Fale Alea ‘a e konisitutone ‘i hono tautea’i ‘a e tokotolu ni.

1997:   Faka’ilo ‘o ‘Akilisi ko hono laukovi’i ‘o e Minisita Polisi ‘i he ‘atikolo ‘a ‘Akilisi na’e pulusi ‘i he Taimi ‘o Tonga pea mo e to e ‘atikolo na’e pulusi ‘i he nusipepa Kele’a pea tautea ‘e he Fakamaau Vusenga Helu ‘o mo’ua taki $500. Na’e toki tala ‘a e tu’utu’uni ko eni ‘i he 1998.

1998:   Ma’asi, na’e hao ai ‘a ‘Akilisi ‘i hono faka’ilo ko e Talisone ‘i hono paaki ‘e he nusipepa fakamamani lahi ko e Wall Street Journal ‘a e fakamatala na’e ha ‘i he nusipepa Kele’a ‘oku TIKITATO ‘a e pule ‘a e Tu’i mo e maumau fakapa’anga mei he ngaahi pa’anga mei he pisinisi ko ia ko e Tongasat.

Fokotu’u ‘a e ‘Ofisi ‘o e Totonu ‘a e Tangata mo e Temokalati ‘o Talekita ai ‘a Lopeti Senituli. (Tonga Human Rights and Democracy Movement)

1999:   To e fakahoko ‘a e Konivesio  ki hono muimui’i ‘a e ngaahi fokotu’u na’e tali ‘i he Konivesio 1992. Fakaafe fakalangilangi ‘a e Kovana Seniale malolo ‘a Nu’usila, Sir Paul Reeves

Lava tokolahi ki he Fale Alea mei he kau memipa ‘a e Human Right and Democracy Movement ki Fale Alea

2004:   Fakahu ha tohi tangi ‘a e kakai ki he ‘ene ‘Afio Tupou IV, ke fakahoko ha fakahaloto (referendum) ‘i he fehu’i:

‘Oku totonu ke fili ‘e he kakai ‘a e kau fakafofonga?

2005:   Na’e fokotu’u ‘e he Tu’i mo e Kapineti ‘a e Komiti Fakafonua ki he Liliu Fakapolitikale (National Committee for Political Reform – NCPR) ke nau fakahoko ha talatalanoa mo e kakai ‘i Tonga pea mo e kau Tonga ‘i muli fekau’aki mo e liliu fakapolitikale. Na’e Sea ‘i he komiti ko eni ‘a e tama Tu’ipelehake kuo mama’o.

2005:   Tukungaue 70% kau ngaue fakapule’anga ‘i he uike ‘e fitu. Na’e poupou ki heni ‘a e kakai ‘o e fonua ‘o nau fakataha mai ‘o nofotaha ‘i Pangai  Si’i. ‘Osi ha ngaahi alelea ‘a e kau taki ‘o e kau ngaue, kau fakafofonga ‘o e kakai ki he fale alea mo e pule’anga, na’e tali ‘a e taumu’a ‘o e tukungaue ke hiki peseta ‘e 60%, 70% moe 80% ‘a e vahenga ‘o e kau ngaue fakapule’anga.

Ko e faka’ilonga faka’osi eni ki he fonua ‘oku ‘i ai ‘a e nganga’ehu fakasosiale ‘oku ofi mai.

2006:   Kimu’a ‘i Novema na’e laka fakahahaloto ‘a e kakai ko e poupou ki he fokotu’u ke fili kotoa ‘a e kau memipa falealea ‘e he kakai.

‘I hono toutou toloi ‘e he Komiti Si’i ‘a e Fale Alea hono ui ha fakataha ‘a e Fale Alea fekau’aki mo e ngaahi ‘isiu ki he liliu fakapolitikale na’e fakatupu ai ‘a e mamahi ‘a e kakai ‘o hoko ai hono tutu mo maumau’i ‘a loto Nuku’alofa.

Novema 16 na’e fakataha ai ‘a e Palemia Feleti Sevele, Kau Minisita, Kau Nopele, Kau Fakafofonga ‘o e kakai pea nau felotoi ke fili ‘e he kakai e kau fakafofonga toko ‘e toko 21 pea fili ‘e he hou’eiki ‘a e toko 9, pea ke kamata ‘i he 2008 pea fakamo’oni ki ai ‘a e Palemia.

2009:   Ko e ’uhi ko hono vahevahe ‘a e fili fakafofonga falealea ke fili fakavahenga, na’e fokotu’u ai ‘a e Paati Temokalati ‘Otumotu Anga’ofa ke tokoni ki hono kemipeini’i ‘a e kau fakafofonga temokalati ki he fale alea.

2010:   Fili ‘a Nopele Tu’ivakano ko e Palemia.

2013:   Foaki kia ‘Akilisi ‘a e fakalangilangi ‘i Columbia ko e Defender for Democracy Award, ‘e he kautaha fakamamani lahi ko e Parliament for Global Action,

2014:   Fili ‘a Samuela ‘Akilisi Pohiva ko e Palemia pea ko e fuofua palemia  fili ia ‘e he kakai.

2017:   Veteki ‘e he ‘Ene ‘Afio, Tupou VI ‘a e Fale Alea ‘o Tonga pea toe ui ‘a e fili falealea fo’ou. Na’e to e fili mai pe ‘e he kakai ‘a e kau PTOA pea to e hoko pe ‘a Samuela ‘Akilisi Pohiva ko e Palemia ‘o Tonga.

2019:   Tu’utu’uni ‘a e Fakamaaulahi ‘i he hopo ‘a e Tongasat na’e ta’efakalao hono ‘ave ‘ehe pule’anga ‘a e pa’anga ‘e $90 miliona mei he pule’anga ki he kautaha Tongasat.

12 Sepitema, malolo ‘a Samiuela ‘Akilisi Pohiva ‘i Auckland New Zealand, neongo kuo malolo ka ‘oku kei mo’ui pe ‘a e visone ‘i he loto mo e ‘atamai ‘o e kau poupou.

Views 40