‘Ikai fa’a tatali tokolahi ke mamata’i ‘ene toe foki maí

Posted: 15-May-2020 08:04 PM

Sports

Kuo hangē kuo nga’utu ‘a māmani ‘i he kei hokohoko atu ‘a hono faka’uaka’i ‘e Mike Tyson honau matá ‘i he’ene ngaahi vitiō kimuí ni ‘oku hā ai ‘a ‘ene fakamālohisino mo ‘ene tuki tangaí pea ne toe faka’osi ‘aki ‘i he fo’i vitioó ‘ene pehē, “ ‘Oku ou foki mai”

Ko e foki mai eni kuó ne ta’u 53 ka na’á ne fakamahino ki he tokolahi, ko e ta’ú ko ha mata’i fika pē, he ‘oku ‘ikai ha holo ia ‘e taha ‘ene tukí ‘o tatau pē he vavé mo e mālohí pea ko e naunau eni ‘okú ne tui te ne toe malava ke ne ikuna ‘a e leta WBA, WBC mo e IBF.

Na’e ‘osi fakahā pē foki ‘e Tyson ia ko ‘ene foki ki he mala’é ke fakahoko ha fanga ki’i fuhu faka’ali’ali mo tānaki ha pa’anga tokoni, ka ‘i he hokohoko mai ko eni hono tuku hake ‘ene ngaahi vitiō fakamālohisinó ‘oku teteki ai ‘a e kau hau ‘o e to’utangata ‘o e ‘ahó ni, na ko e liu mai eni ‘a e tangata ilifia’i lahi taha he mala’e fuhú ke veipā ki he ngaahi letá.

‘Oku toe mālié he kuo toe hā mai eni mo hono kaungā fuhu ‘iloa ko ia ko Evander Holyfield ‘o fakahā ‘oku ne teuteu mo ia ke toe tui ‘a e letá pea foki ki mala’e. Pea ‘oku ‘i ai ‘a e talotalo ngalingali na’a toe fehangahangai ‘a e ongo heló ni ‘i he’ena fuhu hono 3.

Ko e talu pē foki ‘a e mālōlō ‘a Tyson mei he fuhú ‘i he’ene ulungia ‘ia Kevin McBride ‘i he 2005, pea kapau te ne toe foki hake, ‘oku leva ia he muimui he hala tatau na’e ‘i ai ‘a Floyd Mayweather Jr pea mo Manny Pacquiao.

‘Oku kei tu’u pē ‘i he lēkootí ‘a e hoko ‘a Mike Tyson ko e hau ta’u si’i taha ia he fuhu paoni mamafá ‘i he’ene fakapa’ulu ‘a Trevor Berbick ‘i he ta’u 1986 ko hono ta’u 20 pē ia ke ne ikuna ai ‘a e leta WBC.

Faka’ikai’i Mike Tyson ‘a e lau te ne fuhu mo SBW

Na’e kau eni he fuhu na’e talanoa’i lahi he uiké ni ‘i he mītiá hili hono fakahā ‘e he hau mālōlō ‘a māmani he fuhú ‘Iron’ Mike Tyson ‘ene toe foki ki he mala’é hili eni ‘a e ta’u ‘e 15 mei he’ene fuhu fakamuimuí.

Na’e ‘asi mai ai ‘a e ngaahi tukuaki’i kuo me’a’ofa mai ‘e Tyson ha $1miliona ki he sitā tutuku ‘a e All Blacks, Sonny Bill Williams ke na fuhu, ka kuo faka’ikai’i ‘e Tyson ia ‘a e lau ko iá pea ne pehē ‘e ‘ikai ke hoko ‘a e fuhu ia ko ení pea ko e talanoa loi mo fa’u eni ia.

Na’e tukuange ‘e he Daily Mail ‘a e pole fuhu ko eni ‘a e to’a ta’u 53 kia Sonny Bill Williams ‘a ia ko ha fuhu faka’ali’ali eni ‘e fakahoko ki ‘Aositelēlia, ka na’e pehē ‘e Tyson ia ‘oku ‘ikai mo’oni ‘a e tukuaki’i ko ení.

Kae kehe na’e toki hā mai ‘a Sonny Bill Williams ia he uiké ni ‘o tali atu ‘a e pole ko ení ‘aki ‘ene pehē, ko ha monū ia ma’ana kapau ‘e manga ki he ring fakataha mo e tangata ‘oku ‘iloa ko e tangata ilifia’i lahi taha he palanité.

Ko e lēkooti ‘o Sonny Bill Williams ko ‘ene fuhu kotoa ‘e 9 te’eki ke ulungia pea ko Mike Tyson ko e ‘ene fuhu kotoa ‘e 56 mālohi ‘e 50, knockout ai e 44 mo e ulungia ‘e 6.

Views 67

Sports
‘Ikai toe liliu taumu’a Folau ke ne va’inga liiki ma’a Tongá

Kuo ‘ikai pē ke toe holomui ‘a e sitā tutuku ia ‘a e Wallabies,…

Courts
Tukuaki’i talavou ta’u 19 ki he pekia ha tangata ta’u 67 ‘i…

Kuo faka’ilo ‘e he kau polisí ha talavou ta’u 19 ki…

Others
TONGA 'OE 'AHO NI

Koe polokalama "Tonga 'oe 'Aho ni", 'e 'oatu tu'o…

Politics
Kele'a News 210520

1. 'Ikai mo'oni lipooti e kalonikali fekau'aki mo hono 'atita'i…