Laka hake toko 500 kuo puke lolotonga ‘a e fakataputapuí

Posted: 30-Apr-2020 03:41 PM

Courts

Kuo fakahā mei he kau polisí kuo laka hake eni ‘i he toko 500 tupú ‘a e kakai kuo puke ‘i he ngaahi feitu’u kehekehe pē lolotonga ‘a e vaha’a taimi fakataputapui ‘i hono tātāpuni ‘a e fonuá ‘i he faitau mo e feinga ke faka’ehi’ehi mei he vailasi koloná.
‘I ha ongoongo tuku mai na’e hā ai toko 568 fakakātoa ‘o kau ai heni ‘a e toko 33 na’e puke fakataha kinautolu mo e faito’o ta’efakalao talu ‘a e kamata mai ‘a e fakataputapuí mei  he ‘aho 28 ‘o Mā’así.


Ko e lahitaha ‘a e fa’ahinga ko eni na’e puké ko hono maumau’i pē ‘a e lao ‘i he vaha’a taimi nofo ma’ú mei he 8:00pm – 6:00am, pea ko e ni’ihi ko e konā ‘i he feitu’u fakapule’anga, fakafe’ātungia’i ‘a e ngāue ‘a e kau ‘ōfisá pea mo e talangata’a ki he fakahinohino mei he kau ‘ōfisa kuo fakamafai’í.
Ko e toko 568 ko ení ko e toko 357 ai ko hono maumau’i ‘a e lau fakataputapuí, toko 77 ko e konā ‘i he ngaahi feitu’u fakapule’anga, toko 33 ko e puke mo e faito’o ta’efakalao, toko 28 kuo faka’ilo ki he ngaahi hia fakamamahi ‘i ‘apí pea mo e ni’ihi ko e ngaahi hia kehekehe pē ‘o kau ai ‘a e tā, kaiha’a mo e haefale.
Kuo toe ‘unuaki foki ‘a e taimi fakangatangatá pe curfew ‘i he uiké ni ki he 9:00pm – 5:00am, pea kuo fakangalokuloku atu mo e ngaahi sēvesi kehekehe pē, ka ‘oku kei hokohoko atu pē ‘a e ngāue fakataha ‘a e kau polisí, kau tau ‘a ‘Ene ‘Afió mo e kau le’o koló ke fakapapau’i ‘oku kei tauhi pē ‘a e kakaí ki he laó ni neongo ‘oku kamata ke vetevete atu māmālie pē ki he kakaí he ‘oku kei mātu’aki mahu’inga pē ‘a e faka’ehi’ehí neongo ‘oku te’eki ke ‘i ai ha keisi ‘i Tongá ni.
Taimi tatau ‘oku hokohoko atu foki ‘a hono tāpuni ‘a e kau’āfonuá, ‘o kau ai ‘a e ta’ofi ‘a e ngaahi fefolau’aki vakapuna fakavaha’a pule’angá tuku kehe ange pē ‘a e ngaahi vaka fakauike kuo faka’atā ke fetuku mai ai ‘a e ngaahi me’angāue fakafaito’o ki he falemahakí ke ngāue’aki ki he mateuteú.
Ka neongo ení ‘oku ‘i ai ‘a e tu’unga fakafiemālie ‘i he fika ko eni ‘o e faihiá ‘i hono lēkooti mei he ngaahi ‘apitanga polisí ‘a ia ‘oku hā mei heni ‘a e holo ‘aki ‘a e peseti ‘e 37% ‘a e faihiá ‘i hono fakahoa atu ki he vaha’a taimi tatau ‘i he ta’u kuo’osí. ‘Oku pehē mei he kau polisí ‘oku makatu’unga ‘a e holo ko ení mei he lolotonga ngāue’aki ‘e he fonuá ‘a e lao fakataputapuí mo e tātāpuni fakafonuá.

 

Views 233

Government
Fakamamahi mo e maumau he ngaluopé mo’ua $30,000 pe ngāue pōpula…

Kuo fakahu atu he pule’angá ha Lao ki he Fale Alea ‘o Tongá…

International
FEPOTALANOA’AKI ‘A MODI MO BIDEN KE TOE FAKALAKALAKAANGE HONA…

NEW DELHI (Reuters) – Na’e fepotalanoa’aki telefoni ‘a…

International
FAKAHU KAU FA’U LAO MALOLO ‘I HONG KONG HE LAKA FAKAHAHA TUPU…

HONG KONG (Reuters) – Pehe ‘e he kau Polisi Hong Kong na’a…

Editorials
CAN WE AFFORD THE GOVERNMENT’S LIES?

Does creating an image of a government to look good can eventually make a good…