Kamata ngāue lao ki he kau ngāue fakapule’angá ki hono ngāue hala ‘aki mītia fakasōsialé

Posted: 05-Nov-2020 11:08 AM

Government

Fakahā ‘e he Pule Lahi ‘o e Komisoni Kau Ngāue Fakapule’angá, Dr. Lia Maka ‘e lava ke mole e ngāue ‘a e kau ngāue fakapule’angá ‘i he lao fo’ou ko eni ki hono ngāue’aki ‘a e mītia fakasōsialé.


Kuo tuku mai ‘e he CEO ‘a e Komisoni ‘a e kau ngāue fakapule’angá (PSC), Dr. Lia Maka ha’ane fakamatala ‘o fakahā kuo ‘osi ngāue ‘a e lao ki he kau ngāue fakapuleʻangá ʻi hono ngāue koviʻaki ʻo e mītia fakasōsialé pea ‘e malava ke mole ai ‘enau ngāué ‘i ha’anau kaunga ki hono fakaangaʻi mo laukoviʻi ʻa e puleʻangá ʻo tatau pe ki he kau ngāue tuʻumaʻu, kau ngāue lau ʻaho pe konituleki ʻi he puleʻangá.

Ko ‘ene fakamatala eni lolotonga hono faka’eke’eke ia ‘i he lētiō mo e televīsone Tongá ‘i he uike kuo’osí.

‘I he faka’eke’eke ko ení na’e fakahā ai ‘e Dr. Lia Maka ko e lao ko ení ‘oku fakapatonu ki he kau ngāue fakapule’angá pea na’á ne tuku mai ai ‘a e fakatokanga mamafa  kia kinautolu koe’uhí ko e lahi ‘a hono tāpalasia ‘e he kau ngāue fakapule’angá pē ‘a e Pule’anga ‘oku nau ngāue aí ‘o fakafou ‘i he ngaahi peesi mo e kulupu mītia faka-sōsiale pē.

‘A ia ko e ‘uhingá ko ha’ate mēmipa ‘i ha kulupu tokolahi, pē fakafo’ituitui ‘i he ngaahi netiueka faka’initaneti hangē ko e Facebook, Tweeter, Instagram, You Tube, Snap Chat – mo ha fa’ahinga polokalama faka’initaneti pē ‘oku fekau’aki mo e fe’ave’aki fakamatalá.

Na’e pehē ‘e he ‘Ateni Senialé, Linda Folaumoetu’i, ko e lao ko ení na’e fa’u ia ‘i he 2018 pea kuo ‘osi kāsete’i ‘o mo’ui mo fakaivia ʻo kamata he ʻaho 1 ʻo Siulai 2020 pea kuo ‘osi ‘i ai ‘ene ivi fakalao pea ‘oku totonu ke talangofua mo faipau ki ai ‘a e kau ngāue fakapule’angá.

‘I he fakamatala ʻa Dr Lia Maká, naʻe ʻosi talanoa’i ʻa e kaveinga ko ʻeni ʻe he fakatahaʻanga ʻo e kau Talēkita Pule (CEO) he ngaahi potungāué pea fakahū atu ki he Komisoní mo e ʻofisi ʻo e ʻAteni Senialé.

“Ko e taumuʻa ngāue ko ʻení naʻe fakapatonu ia ki he ngāueʻaki ʻa e mītia fakasōsialé ʻe he kau ngāue fakapuleʻangá ʻa ē ʻoku ʻi he malumalu ʻo e Komisoni ʻo e kau Ngāue Fakapuleʻangá (PSC). ‘Oku ʻiai ʻa e ngaahi Potungāue mo e ʻu Vaʻa Ngaue (Departments) ʻe 20 oku nau ʻi he malumalu ʻo e laó ni.

‘A ia ‘e malava ke uesia e ngāue ʻa ha tokotaha ngāue fakapuleʻanga ʻoka fakatotoloʻi ʻoku halaia ‘i he laó ni. ‘Oku kau heni ha tohi ‘o laukovi ki he puleʻangá, fakaangaʻi ʻaki ʻa e laukovi pe ko ha poupou ʻi ha faʻahinga kulupu –  pe poupou ʻaki e fanga kiʻi fakaʻilonga ʻo e mitia sosialé (react) ‘o ngāue’aki ‘a e ‘emoji’ ʻo hangē ko e nima mo e matá. Ka fai ha fakatotolo ʻo maʻu ʻe ala mole ʻa e ngāué ʻoka halaia.

Na’e pehē ‘e he ‘Ateni Senialé ko e taha e ngaahi fekau mei he tuʻutuʻuni ko ʻení ʻa e fiemaʻu ʻaupito ke fakaʻapaʻapaʻi ʻa e ngeia ʻo e tokotaha kotoa pe, ʻi lotoʻi puleʻanga mo e kakai fakalukufua ʻo e fonuá.

Taimi tatau naʻe ʻikai ke fakaʻikaiʻi ʻe he ‘Ateni Senialé ʻa e totonu ko ia ʻa e tokotaha kotoa ke fakahā ʻenau fakakaukaú, hangē ko ia ‘oku ‘omai ‘e he kupu 7, ʻo e Konisitūtoné ʻa ē ʻoku ne foaki ʻa e totonu mo e tau’atāiona ke leá, ka neongo ení ʻoku ʻikai ‘uhingá ke fakaaoao ʻa e ngaahi totonu kotoa ʻoku ʻomai ʻe he laó, ʻoku ʻiai pe ʻa hono ngaahi tuʻutuʻuni fakangatangata.

‘A ia na’á ne pehē he ʻikai lava ʻo tuku mai ha lea pe fakakaukau ʻa ia ʻe fepaki ia mo e lao ʻo e laukoviʻí, ko e lao ʻeni ʻoku ne fakamahino ʻa e fakaʻapaʻapa mo e moʻoni ha fakamatala ʻi he lea pe tohi.

‘Oku ʻikai ngofua ke te tukuatu ha ngaahi fakamatala fakapulipuli koeʻuhí ko e malu mo e ngāue ʻa e fonuá, ʻo hangē ko e ngaahi fakamatala ‘i he vā fakapuleʻanga, maluʻi e fonuá.

Ko e fakangatangata ʻi he lea pe tohi fekauʻaki mo e ʻEne ʻAfió mo Hono Falé ʻo malava ai ke uesia pe tuʻunuku mai ke uesia ʻa e malu mo e hao ʻo e Fale ʻo ‘Ene ʻAfió.
Ko e ngaahi lao ko ia naʻe fatu fekauʻaki mo e kau ngāue fakapuleʻangá.

Naʻe fatu ʻi hano tukuhifo taʻemoʻoni pe taʻetotonu ha niʻihi pe fakahoko ha ngaahi fakamatala ki ha taha ʻaia ʻe malava ke moʻua ai ha taha he laukoviʻi.

Ko e lahi taha pē ko e 96% ʻo e kau ngāue fakapuleʻangá, ʻoku ʻiai ʻenau feisipuka (facebook) pea ‘oku ‘i ai ‘a e ni’ihi ‘oku ‘i ai ‘enau ngaahi peesi kehe ka ʻoku nau ngāueʻaki ʻa e hingoa fakapuli pea pehē ki hono ngāueʻaki ʻi he tuʻa taimi ngāué.

Naʻe fakahā ʻe Dr Lia Maká ʻoku kaunga ʻi he tuʻutuʻuni ko ʻení hano ngāueʻaki ʻa e ʻu meʻa ngāue ʻa e ngāueʻangá ki he mītia fakasōsialé pea kau ai pe mo e ngāueʻaki ʻi he tuʻa taimí.

‘E kau ai mo ha ngāueʻaki pe haʻate meʻa ngāue fakafoʻituitui, komipiuta pe telefoni ʻi he taimi ngāué, ko e kotoa ʻeni ʻoku malava ke muimuiʻiʻaki ha launga.

Makehe mei hení na’e ‘osi tuku mai foki ‘a e ngaahi tu’utu’uni  ngāue fo’ou ‘a e Pule’angá ‘a ia ‘e ala mo’ua heni mo ha kautaha ongoongo te ne pulusi pe tuku atu ha fa’ahinga fakamatala pelepelengesi ‘a e pule’angá pea ‘e a’u ki he $2,000 ‘a e tauteá.

Na’e fai hono fehu’ia lahi ‘aupito ‘e he ngaahi kautaha ongoongó ‘ae taumu’a ‘oe tu’utu’uni ko ení pea na’e tukuaki’i ai ‘e he kau faiongoongo ‘e ni’ihi ‘oku feinga ‘ae Pule’angá ke ta’ota’ofi ‘a e mītiá mei hono tuku atu ‘a e ngaahi fakamatalá pea ‘oku mole heni ‘a e tau’atāina ‘a e ongoongó.

Kaekehe ko e lao ko eni ki he kau ngāue fakapule’angá kuo ‘osi ngāue ia, pea ‘e malava ke tuli ai kinautolu mei he ngāué.

Views 2510

Editorials
CAN WE AFFORD THE GOVERNMENT’S LIES?

Does creating an image of a government to look good can eventually make a good…

International
NGA’UNU ‘A SIAPANI KE FAKAAKEAKE NGAAHI KOLO KI ‘UTA KA ‘OKU…

TOKYO (Reuters) – ‘I he hoko mai ‘a e corona virus ‘o…

Press Releases
An Online Prayer Meeting for Religious People Around the World…

Amid the corona crisis, which causes about 500,000 confirmed cases and 8,000…

Editorials
TONGA IS IN A DEMOCRATIC MESS

There is a sense of confusion about our political…